İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 401 Hüküm no: 467 Orijinal metin no: [67b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mahmud’un, Sultan Abdülhamid Han vakfından icareli bir bab kasap dükkânı gediğinin yarım hissesini sağire Hatice’ye devrettiği Kasab gediği Ma‘rûz Galata’ya muzâfe kasaba-i Kasıkpaşa’da Cumapazarı nâm mahalde sâkin iken bundan akdem vefât eden Kasab İbrahim b. Yusuf’un sulbiye-i kebîre kızı Hatice’nin vâlidesi ve bâ-hüccet vasîsi mu‘arrefetü’z-zât Âişe bt. Mahmud nâm Hatun meclis-i şer‘-i şerîf-i enverde Hüdâvendigâr-ı sâbık merhûm cennet-mekân firdevs-âşiyân Sultan Abdülhamid Hân hazretlerinin evkāfı mütevellîleri tarafından mürsel câbi-i vakf Halil Efendi mahzarında bi’l-vesâye ikrâr-ı tâm ve takrîr-i kelâm edip vakf-ı mezbûr musakkafâtından Yedikule hâricinde kâin altıncı selhhâneye merbût kasaba-i mezbûrede sel köprüsü üzerinde vâki‘ bir bâb kasab dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmenin mecmû‘u ile yine kasaba-i mezbûrede Ada nâm mahalde Büyük câmi‘-i şerîfi kurbünde mumhâne karşısında kâin birinci selhhâneye merbût bir bâb kasab dükkânı derûnunda mevcûde kezâlik beyne’l-esnâf gedik tâ‘bir olunur âlât-ı lâzıme-i ma‘lûmenin nısf hisse-i şâyi‘asına müteveffâ-i mezbûr Kasab İbrahim hayatında bâ-temessük-ı vakf-ı müşârun-ileyh mutasarrıf [68a] iken fevt oldukda mutasarrıf olduğu zikr olunan gedikler kızı mezbûre Hatice ile ve diğer kızı Emine’ye intikāl üzerlerine tahrîr olunmaksızın mezbûre Emine dahi bilâ-veled fevt hisse-i mezkûresi mahlûl ve cânib-i vakfa âid olmağla mütevellî-i merkūm mahlûl olan hisse-i mezkûreyi lede’l-müzâyede bin yüz yirmi beş guruşda karar ve ziyâde ile tâlib-i âharı zuhûr etmemekle ben malımdan meblağ-ı mezbûr bin yüz yirmi beş guruşu cânib-i vakfa teslîm ve umûr-ı vakfa sarfla istihlâka ba‘de’l-emr mahlûl olan hisse-i mezkûreyi dahi kızım sagīre-i mezbûre için bi’l-vesâye istîcâr eylediğimde mütevellî-i vakf-ı müşârun-ileyh dahi îcâr etmekle meblağ-ı mezbûrun istirdâdına müte‘allika da‘vâdan cânib-i vakfı ve mütevellî-i vakf-ı müşârun-ileyhin zimmetini kabûlü hâvi ibrâ ve iskāt eyledim deyü ikrârını câbi-i merkūm ba‘de’t-tasdîk mârru’z--zikr âlât-ı muharrere-i mezkûreler sagīre-i mezbûre Hatice’nin babası intikālından ve kız karındaşı mezbûre Âmine mahlûlünden sagīre-i mezbûre Hatice üzerine defter-i vakfa ba‘de’l-kayd temessük i‘tâsını vasiyy-i mezbûr istid‘â eylediği İstanbul Mahkemesi’nden huzûr-ı âlîlerine i‘lâm olundu. Fî-15 min C sene [1]217