İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 405 Hüküm no: 472 Orijinal metin no: [68b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kogas v. Serkiz’in, Sarraf Sahak v. Atam aleyhine açtığı dükkân kirası davasında iddiasını ispat edemediğinden muarazadan men edildiği 5.792 guruş dükkân îcârı mu‘ârazadan men‘ Ma‘rûz Arzuhâl eden Kogas v. Serkiz nâm zimmî meclis-i şer‘-i enverde Sarraf Sahak v. Atam nâm zimmî muvâcehesinde Karabet v. Manas nâm zimmî hâzır olduğu hâlde mersûm Sahak zimmînin taht-ı îcâresinde olan bahçekapısı dâhilinde kâin bir bâb duhâncı dükkânında hâzır-ı mersûm Karabet zimmînin vâsıtasıyla elli iki buçuk ay mütemekkin olup dükkân-ı mezbûrun kirâsı beher şehr dörder guruş iken mersûm Sahak zimmî beher şehr on beşer guruşdan müddet-i mezkûrede cem‘an yedi yüz seksen yedi buçuk guruşumu ahz etmekle mârrü’l-beyân elli iki buçuk ay müddetde dörder guruşdan iktizâ eden iki yüz sekiz guruş makbûzu olan meblağ sâlifü’z-zikr yedi yüz seksen yedi buçuk guruşdan fürû‘-nihâde oldukda bâkīsi olan beş yüz yetmiş dokuz buçuk guruşu bi-gayr-ı hakkın benden ahz etmekle istirdâd ederim deyü da‘vâ ettikde ol dahi cevâbında ben dükkân-ı mezkûru beher şehr on beşer guruşa müdde‘î-i mersûm Kogas zimmîye îcâr ol dahi ba‘de’l-istîcâr dükkân-ı mezkûr mârrü’l-beyân elli iki buçuk ay taht-ı îcâresinde olup ol vechile meblağ-ı sâlifü’z-zikr yedi yüz seksen yedi buçuk guruşu dükkân-ı mezkûrun kirâsı olmak üzere def‘ ve teslîm ben dahi bi-hakkın kabz etmişdim deyü ba‘de’d-def‘ ve’l-inkâr dâfi‘-i mersûm Sahak zimmî ber-vech-i muharrer def‘-i mezkûrunu lede’t-tezkiye adl ve makbûlü’ş-şehâde idükleri ihbâr olunan Haçok v. Sahak ve Estefan v. Ohan şehâdetleriyle bi’l-muvâcehe ber-nehc-i şer‘î isbât etmeğin mûcebiyle müdde‘î-i mersûm Kogas zimmî da‘vâ-yı mezkûresiyle mesfûr Sahak zimmîye bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî-26 min C sene [1]217