İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 406 Hüküm no: 474 Orijinal metin no: [68b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Margarid v. Zafiri’nin, Nikola v. Yani’ye olan borcunu kefaletlerinden dolayı Yorgi ve Kırinkıl’in ödemesi gerektiği 1.200 guruş kefâletlerine binâen edâya tenbîh Ma‘rûz Bakkāl tâifesinden Nikola v. Yani nâm zimmî meclis-i şer‘-i şerîf-i enverde arzuhâl eden Margred v. Zafiri nâm zimmî hâzır olduğu hâlde bakkāl tâifesinden Yorgi v. Tanaş ve Kırinkıl v. Zafiri nâm zimmîler muvâcehelerinde hâzır-ı mersûm Margarid zimmî İstanbul’da Mercançarşısı kurbünde kâin Hacı Receb dükkânı demekle ma‘rûf bir bâb bakkāl dükkânında müşâhereten müstecirim olup dükkân-ı mezkûr derûnunda mevcûd malım olan bin guruş kıymetli sermâyemi fuzûlî âhara bey‘le istihlâk etmekle meblağ-ı mezkûr bin guruş ile dükkân-ı mezkûr kirâsından mersûm Margarid zimmî zimmetinde alacağım olan iki yüz guruş ki cem‘an bin iki yüz guruşa tarefeynden bi’l-emr ve’l-kabûl mersûmân Yorgi ve Kırinkıl zimmîler ma‘an kefîl ve zâmin olmalarıyla meblağ-ı mezbûr bin iki yüz guruşu mersûmân Yorgi ve Kırinkıl zimmîlerden kefâlet-i mezkûrelerine binâen hâlâ taleb ederim deyü da‘vâ ettikde mersûmân Yorgi ve Kırinkıl zimmîler dahi ber-vech-i muharrer müdde‘âsını ve cihet-i kefâlet-i mezkûreden müdde‘î-i mesfûr Nikola zimmîye meblağ-ı mecmû‘-ı mezkûr bin iki yüz guruş zimmetlerinde sahîhan deynleri olduğunu ikrâr u i‘tirâf ve hâzır-ı mersûm Margarid zimmî dahi tasdîk etmeğin mûcebiyle meblağ-ı mecmû‘-ı mezkûr bin iki yüz guruşu müdde‘î-i mesfûr Nikola zimmîye bi-hükmi’l-kefâle edâ ve teslîme mersûmân Yorgi ve Kırinkıl zimmîlere tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî-20 C sene [1]217