İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 407 Hüküm no: 475 Orijinal metin no: [69a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid İbrahim Çelebi b. Mustafa ile kasab Mustafa b. Ali’nin alacak davasında sulh oldukları 370 guruşdan 190 guruşa sulh-i ibrâ Ma‘rûz Sâhib-i arzuhâl es-Seyyid İbrahim Çelebi b. Mustafa nâm kimesne meclis-i şer‘-i münîrde İstanbul’da balkapanı tüccârından derûn-ı arzuhâlde mezkûrü’l-ism Kasab Mustafa b. Ali nâm kimesne muvâcehesinde mezbûr Kasab Mustafa târih-i i‘lâmdan sekiz ay mukaddem malımdan bi-gayrı hakkın üç yüz yetmiş guruşumu ahz etmekle hâlâ istirdâd ederim deyü tasaddî eylediğim da‘vâmdan bâ-tavassut-ı muslihîn merkūm Kasab Mustafa ile an inkâr kat‘an li’n-nizâ‘ yüz doksan guruş bedel-i makbûza ba‘de akdi’l-musâlahati ve’l-kabûl ziyâde müdde‘âma ve bi’l-cümle husûs-ı mezkûra müte‘allika âmme-i da‘vâdan merkūm Kasab Mustafa ile gāib ani’l-meclis Yağcı Ömer Ağa ve ma‘lûmü’l-esâmî bi’l-cümle kapan-ı mezkûr tüccârlarının zimmetlerini ibrâ-yı âmm-ı sahîh-i şer‘î ile ibrâ ve iskāt eylediğimde ol dahi bana medfû‘u olan meblağ-ı mezbûr yüz doksan guruşun istirdâdına müte‘allika âmme-i da‘vâdan benim zimmetimi ibrâ ve iskāt ve tarefeynden her birimiz ber-vech-i muharrer âharın ibrâsını kabûl eyledik deyü ikrâr ve tasdîkleri tescîl ve İstanbul Mahkemesi’nden huzûr-ı âlîlerine i‘lâm olundu. Fî-15 min C sene [1]217