İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 409 Hüküm no: 477 Orijinal metin no: [69a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mahmud’un, Sultan Abdülhamid Han vakfından icareli bir bab kasap dükkânı gediğini vesayeti gereği Ömer Ağa’ya sattığı Bi’l-vesâye kasab gediği mübâya‘ası Ma‘rûz Hüdâvendigâr-ı sâbık cennet-mekân firdevs-âşiyân merhûm ve mağfûrun leh Sultan Abdülhamid Hân hazretlerinin evkāfı musakkafâtından olup Yedikule hâricinde kâin altıncı selhhâneye merbût Galata’ya muzâfe kasaba-i Kasımpaşa’da sel köprüsü üstünde vâki‘ bir bâb kasab dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmelere bâ-temessük vakfa mutasarrıf olan sagīre Hatice bt. Kasab İbrahim’in vâlidesi ve tesviye-i umûruna bâ-hüccet vasîsi mu‘arrefetü’z-zât Âişe bt. Mahmud nâm Hatun meclis-i şer‘-i enverde hâlâ ser-kassâb-ı hâssa İzzetlü Mustafa Ağa tarafından mürsel vekîli kasablar kethüdâsı el-Hâc Halil Ağa ve ustalarından mazbûtü’l-esâmî kimesneler hâzırlar oldukları hâlde kasab ustalığını idâreye kādir idüğü ihbâr olunan bâ‘isü’l-i‘lâm Kasab Ömer Ağa b. Yusuf mahzarında bi’l-vesâye takrîr-i kelâm edip sagīre-i mezbûrenin ber-vech-i muharrer mutasarrıfe olduğu âlât-ı lâzıme-i ma‘lûmeleri bâ-mesûğ-ı şer‘î bedel-i misli idüğü ihbâr olunan bin dokuz yüz guruş bedel-i makbûz mukābelesinde merkūm Kasab Ömer’e bâ-izn-i mütevellî bi’l-vesâye ferağ ve kasr-ı yed eylediğimde ol dahi ber-vech-i muharrer ba‘de’l-kabz ve’l-kabûl fîmâ ba‘d âlât-ı lâzıme-i mahsûsada kızım sagīre-i mezbûrenin aslan ve kat‘an alâka ve medhali kalmayıp merkūm Ömer Ağa’nın dâhil-i havza-i tasarrufu olmuşdur dedikde merkūm Ömer Ağa dahi mukırra-i mezbûreyi ba‘de’t-tasdîk âlât-ı muharrere-i mezkûreler sagīre-i mezbûrenin üzerinden merkūm Ömer Ağa’nın üzerine defter-i vakfa ba‘de’l-kayd yedine temessük i‘tâ buyrulmasını istid‘â eylediği İstanbul Mahkemesi’nden huzûr-ı âlîlerine i‘lâm olundu. Fî-28 min C sene [1]217