İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 409 Hüküm no: 478 Orijinal metin no: [69b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kandil gecesinde cami ve mescitlerde kandil yakılması Bâ-sahh İstanbul Kādısı Efendi Faziletlü Efendi şeref-yâfte-i sudûr olan hatt-ı hümâyûn-ı şevket-makrûn-ı mülûkâne ve i‘lâmınız mûcebince leyle-i mezkûrede îkād-ı kanâdil olunmak için kayyımbaşılara tenbîh eyleyesin deyü buyruldu. Fî-7 min C sene [1]217 İkād-ı kanâdil Ma‘rûz İşbu sâl-ı bâhirü’ş-şeref sene seb‘a aşerete ve mi’eteyn ve elf gurre-i Cumâdelâhıre hâlâ bi’r-rü’ye sâbite olmayıp lâkin gurre-i merkūme yevm-i Çarşambadan mazbût olmağın tekmîl-i selâsin ile gurre-i Recebi’l-ferd işbu gelecek Cuma gününden olmak iktizâ etmekle yevm-i merkūmun gecesi leyle-i Regāib olmağın ol leyle-i mübârekeye ta‘zîmen ve ihtirâmen âdet-i hasene-i devlet-i aliyye ve kā‘ide-i müstahsene-i saltanat-ı seniyye üzere minârât-ı cevâmi‘ ve me‘âbid îkād-ı kanâdil-i nûr-efşâ ile tezyîn ve kulûb-ı müminîn-i meserret-karîn olunmak husûsu selâtîn-i âlişân —aleyhim rahmetü mine’r-Rahmân— hazerâtı câmi‘-i şerîfleri kayyımlarına bâ-fermân-ı âlî tenbîh buyrulmak iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî-26 min C sene [1]217