İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 410 Hüküm no: 479 Orijinal metin no: [69b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Emine bt. Emrullah ve Rukiye bt. Ahmed’in evlerine sonradan açtıkları pencerelerin kapatılması gerektiği Keşf-i pencere ve tahta-pûş Ma‘rûz Sâdır olan fermân-ı âlîlerine imtisâlen zikri âtî husûsun mahallinde istimâ‘ ve fasl ve hasmı için kıbel-i şer‘den mürsel kâtib-i sâni Merhabâzâde Mahmud Efendi bi’l-ma‘iyye rü’yete me’mur nezâret-i Hazret-i Sadr-ı a‘zâmîde âsûde evkāf müfettişi umdetü’l-müderrisîni’l-kirâm Mehmed Seyyid Efendi tarafından mürsel Kâtib Hayrullah Efendi ve hâssa mi‘mârı hulefâsından Mehmed ve Ali Halîfeler ile nezâret-i dâ‘îlerinde âsûde evkāfdan merhûm İlyas v. Sinan Vakfı musakkafâtından İstanbul’da Ayazmakapısı kurbünde Hoca Hayreddin Mahallesi’nde vâki‘ derûn-ı arzuhâlde mezkûre Şerîfe Emine bt. Emrullah ve Rukiye bt. Ahmed nâm Hatunların mutasarrıfe oldukları menzile varıp huzûr-ı Müslimînde bi’l-ma‘iyye akd-i meclis-i şer‘-i âlî ettiklerinde vakf-ı mezbûrun mütevellîsi el-Hâc Mehmed Emin Efendi tarafından mürsel câbi-i vakıf es-Seyyid el-Hâc Hasan Çelebi ile nezâret-i hazret-i müşârun-ileyhde âsûde mevkūfâtı merhûm Mehmed Efendi vakfının mütevellîsi Hüseyin Ağa tarafından vekîl-i şer‘îsi câbi-i vakıf İsmail Efendi hâzır oldukları hâlde sâhibetey arzuhâl zâtları mu‘arrefe olan Râbia bt. Ömer ve diğer Şerîfe Emine bt. Hüseyin nâm Hatunlar meclis-i ma‘kūd-ı mezkûrda kezâlik zâtları mu‘arrefe olan mezbûretân Şerîfe Âmine ve Rukiye Hatunlar muvâcehelerinde mezbûretânın menzilinde olan dehliz tahta-pûşundan ve fevkānî sagīr odasının iki aded muhdes pencerelerinden bizim menzilimizin makarr-ı nisvân olan mevâzi‘ine nezâret ve zarar-ı mübeyyeni olmağla men‘ ü def‘ olunmak matlûbumdur deyü da‘vâ eylediklerinde mezbûrân-ı dâ‘îleri ve mi‘marân-ı merkūmân nazar eylediklerinde fi’l-hakīka vech-i meşrûh üzere zarar-ı mübeyyeni olduğu lede’l-mu‘âyene zâhir ve mütehakkık olup ve mezbûretân Şerîfe Âmine ve Rukiye’nin mevcûd tahta-pûşunun tarafına dolma duvar ve mevcûd tahta-pûşun tahtında tûlen üç zirâ‘ ve kadden üç zirâ‘ tahta havâle ile pencerelerinin nezâret ve zarar-ı mübeyyeni def‘ olur deyü mi‘marân-ı mezbûrân vesâir ehl-i vukūf haber verdiklerini mezbûrân dâ‘îleri meclis-i şer‘a gelip mezbûrât muvâcehelerinde inhâ ve takrîr etmeleriyle mûcebince mezbûretân Şerîfe Âmine ve Rukiye’nin mevcûd tahta-pûşun tarafına dolma duvar ve mevcûd tahta-pûşunun tahtından tûlen üç zirâ‘ ve kadden üç zirâ‘ tahta havâle ile nezâret ve zarar-ı mübeyyenini def‘a mezbûretân Şerîfe Âmine ve Rukiye Hatunlara tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî-20 min C sene [1]217