İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 411 Hüküm no: 480 Orijinal metin no: [69b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nehabet v. Serkiz ile Davit v. Merdhay’ın alacak davasında bir birlerinin zimmetini ibrâ ettikleri 550 guruşdan elli kuruşa sulh ve ibrâ Ma‘rûz Derûn-ı arzuhâlde mastûrü’l-ism Nehabet v. Serkiz zimmî meclis-i şer‘de arzuhâl eden Davit v. Mürdehay Yahûdi muvâcehesinde mesfûr Tavit Yahûdi zimmetinde bundan akdem malımdan ve yedimden bi-safka-i vâhide iştirâ ve kabz eylediği biri yeşil ve biri kırmızı gezîye kaplı dülger paçası iki nebeş kürek semeninden hakkım olan bin iki yüz elli guruşun dört yüz guruşunu nakden ve üç yüz guruşunu Yahûdi-i mersûmdan iştirâ ve kabz eylediğim bir çarşal? ve bir yatagān bıçağı ve ma‘lûmü’l-mikdâr elvân parça semenleri olan üç yüz guruşa takāsan cem‘an yedi yüz guruşunu ahz u istîfâ etmemle ol vechile bâkīsi olan beş yüz elli guruşu hâlâ taleb ederim deyü tasaddî eylediğim da‘vâmdan bâ-vesâtet-ı muslihîn bi’t-tav‘ ve’r-rızâ mersûm Davit Yahûdi ile elli guruş bedel-i medfû‘ ve makbûza ba‘de akdi’l-musâlahati ve’l-kabûl mâ‘adâ beş yüz guruşa ve târih-i i‘lâma gelince beynimizde cereyân eden sâir cemî‘-i hukūk-ı şer‘iyyeye müte‘allika mutlaka âmme-i de‘âvî ve mütâlebât ve kâffe-i eymân ve muhâsamâtdan ben Yahûdi-i mersûmun zimmetini ol dahi kezâlik benim zimmetimi her birimiz şürût-ı müfside ve uhûd-ı mübtileden âri ve cebr ve kerhden hâli ibrâ-i âmm-ı sahîh-i şer‘î ile ibrâ ve iskāt ve her birimiz ber-minvâl-i muharrer âharın ibrâsını kabûl eyledik deyü ikrâr ve tasdîkleri İstanbul Mahkemesi’nden huzûr-ı âlîlerine i‘lâm olundu. Fî-5 min-Receb sene [1]217