İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 414 Hüküm no: 483 Orijinal metin no: [70a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Daha öncesinden debbâğ esnafınlığından çıkarılan Hacı Mustafa’nın, cezasını çektiği ve ıslah olduğu gerekçesiyle tekrar esnaflığa dönmesine müsaade edildiği Debbâğ esnâfına dâir i‘lâm Ma‘rûz İstanbul’da Yedikule’de vaki‘ debbâğân esnâfının ahi babaları el-Hâc Ahmed ve kethüdâları es-Seyyid el-Hâc Ömer Efendi ve yiğitbaşı Molla Halil ve müsinn-i ihtiyâr ve ustalarından el-Hâc Hüseyin Ağa ve es-Seyyid el-Hâc Ahmed ve Süleyman Ağa ve Hacı Lütfullah vesâir esnâf-ı merkūmeden cerîdede mazbûtü’l-esâmî kimesneler meclis-i şer‘-i münîrde bundan akdem ba‘zı cünha ve nâ-hemvâre harekete ictisârına mebnî esnâf-ı merkūmeden tard ve teb‘îd olunan el-Hâc Mustafa hâzır olduğu hâlde her biri takrîr-i kelâm edip hâzır-ı mezbûr el-Hâc Mustafa mukaddemâ kendi haliyle meşgūl olmayıp vazîfesinden hâric umûra müdâhale üzere olduğundan esnâfımızdan teb‘îd etmişdik lâkin fukarâdan olup tavr-ı kadîmini terk ve ıslâh-ı nefs etmekle fîmâ ba‘d ancak kendi mutasarrıf olduğu hissesine kanâ‘at-birle mâ‘adâ gön ve kösele ve sahtiyân ve tirşe ve tutkal iştirâ etmeyip ve işlemeyip ve esnâfımız umûruna müdâhale etmemek ve hissesini bey‘ edenlerin hisselerini dahi almayıp kendi hissesine kanâ‘at etmek ve eğer işbu şürûtun mugāyiri kemâ-fi’s-sâbık harekât-ı nâsezâya mütecâsir olur ise ma‘rifet-i şer‘ ve kethüdâ ve ustalar ma‘rifetleriyle tedîb olunmak üzere râzı oldukda bizler dahi işbu şürût ve kuyûd ile esnâfımız içinde ancak mutasarrıf olduğu hissesine kanâ‘at ve kâr u kesbiyle meşgūl olmak üzere haline merhameten râzılar olduk dediklerinde hâzır-ı mezbûr Mustafa bi-tamâmihî tasdîk eylediği İstanbul Mahkemesi’nden huzûr-ı âlîlerine i‘lâm olundu. Fî-10 min-Receb sene [1]217