İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 416 Hüküm no: 485 Orijinal metin no: [70b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hıristo v. Luka’nın, Yasef v. Aram’a olan borcunu ödemesi gerektiği 161,5 guruşdan 70 guruşa sulh ve ibrâ Ma‘rûz Arzuhâl eden Mismârcı Yasef v. Aram Yahûdi meclis-i şer‘-i hatîrde dülger kalfalarından derûn-ı arzuhâlde merkūmü’l-ism Hıristo v. Luka nâm zimmî muvâcehesinde mesfûr Hristo zimmetinde bundan akdem mâlımdan ve yedimden iştirâ ve kabz eylediği vezn ve fiyatı beynimizde ma‘lûm mismâr semeninden iki yüz guruşu hakkım olmağla meblağ-ı mezbûru zimmî-i mesfûrdan taleb ve da‘vâ eylediğimde ol dahi meblağ-ı mezbûru tamamen sana edâ ve teslîm etmişdim deyü beni def‘a tasaddî eylediğinden mâ‘adâ târih-i i‘lâmdan bir ay mukaddem beher vakıyyesi on dokuzar paraya olmak üzere malımdan ve yedimden iştirâ ve kabz eylediğin üç yüz kırk vakıyye hurda mismâr semeninden cem‘an yüz altmış bir buçuk guruş zimmetinde alacağım vardır deyü benden da‘vâya tasaddî ben dahi ber-vech-i muharrer def‘ini ve müdde‘âsını inkâr-birle beynimizde ba‘de vukū‘ı’l-münâza‘a bâ-vesâtet-i muslihîn ben ber-minvâl-i muharrer tasaddî eylediğim iki yüz guruş müdde‘âmdan bi’t-tav‘ ve’r-rızâ mersûm Hristo zimmî ile yetmiş guruşa ba‘de akdi’l-musâlahati ve’l-kabûl bedel-i sulh-i mezkûrdan mâ‘adâ iki yüz guruşa varınca ziyâdesi olan yüz otuz guruşa ol dahi benden iddi‘â eylediği meblağ-ı mezbûr yüz altmış bir buçuk guruşa müte‘allika âmme-i da‘vâdan her birimiz âharın zimmetini şürût-ı müfside ve muvâza‘adan âri ve cebr ve kerhden hâli ibrâ ve iskāt ve her birimiz âharın ibrâsını kabûl eyledik mukırr-ı Yahûdi-i mersûmun bi’l-cümle takrîr-i meşrûhunu mesfûr Hristo tasdîk ve ber-minvâl-i muharrer kabûlü hâvi ibrâ eylediğini ve ibrâdan müstesnâ bedel-i sulh-i mezkûr yetmiş guruş zimmetinde sahîhan Yahûdi-i mersûma deyni olduğunu kat‘iyyen ikrâr u i‘tirâf etmeğin alâ-mûceb-i ikrârihi meblağ-ı mezbûr yetmiş guruşun bi’t-taleb Yahûdi-i mersûma edâsıyla mesfûr Hristo zimmî ilzâm olunduğu mübâşir es-Seyyid Edhem Çavuş yediyle huzûr-ı âlîlerine i‘lâm olundu. Fî-12 min-Receb sene [1]217