İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 417 Hüküm no: 486 Orijinal metin no: [70b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çukadâr Ahmed b. Mehmed’in, Şerife Ayşe Hatun bt. Halil’in zimmetini ibra ettiği Meşrûta menzil ibrâsı Ma‘rûz Sâhib-i arzuhâl Çukadâr Ahmed b. Mehmed nâm kimesne meclis-i şer‘-i enverde nezâret-i dâ‘îlerinde âsûde evkāfdan merhûm Şeyh Muhyiddin Kocavî vakfı musakkafâtından zikri âtî bir bâb menzile bi’l-meşrûta vâzı‘u’l-yed olan Şerîfe Âişe Hatun bt. Halil mahzarında hâlâ vakf-ı mezbûrun bi’l-meşrûta mütevellîleri es-Seyyid Latif Efendi b. Feyzullah ile Şerîfe Fâtıma bt. es-Seyyid Mehmed nâm Hatun tarafından husûs-ı âti’l-beyânda vekîl olduğu zâtını ârifân es-Seyyid el-Hâc Mehmed Ağa b. Ali ve es-Seyyid Mehmed Emin b. Ömer nâm kimesne şehâdetleriyle sâbit Ahmed Ağa b. Süleyman hâzır oldukları hâlde vakf-ı mezbûr musakkafâtından olup süknâsı evlâd-ı vakf meşrûta İstanbul’da Atîkalipaşa Mahallesi’nde ma‘lûmü’l-hudûd bir bâb menzilde olan evlâd-ı vâkıfdan zevcem müteveffât Şerîfe Zübeyde Hatun bi’l-meşrûta sâkine iken menzil-i mezkûr bin yüz doksan altı senesi vukū‘ bulan harîkde muhterik oldukda eser-i binâ kalmayıp arsa-yı sırfe kaldıkda benim ol târihde vakf-ı mezbûrun mütevelliyesi olan kayın vâlidem Şerîfe Hatice Hatun’un izniyle taksîm için malımdan arsa-yı mezbûre üzerine menzil binâ ve bir müddet zevcem mezbûre ile sâkinler olup zevcem mezbûre fevt oldukda mezbûre Şerîfe Âişe Hatun menzil-i mezbûru ber-vech-i muharrer meşrûtiyet üzere zabt ve derûnunda sâkine olmağla suâl olunup ebniye-i mezkûreden keff-i yedi murâdımdır deyü da‘vâ ettikde mezbûre Şerîfe Âişe Hatun cevâbında menzil-i mezkûrun [71a] arsa ve ebniyesi vakf-ı mezbûrdan olup ve benim süknâya ihtiyâcım olmağla şürût-ı vâkıf-ı mezbûr üzere sâkine olurum deyü vaz‘-ı yedini ikrâr ve ber-vech-i muharrer müdde‘î-i mezbûrun müdde‘âsını hâzırân-ı mezbûrân ile ma‘an inkâr etmeleriyle müdde‘î-i mezbûr Ahmed ber-vech-i muharrer müdde‘âsını isbât için beyâna havâle olundukda def‘a-i sânîye terâfu‘larında müdde‘î-i mezbûrun tarafından husûs-ı âti’l-beyânı ikrâr ve ibrâya vekîl olduğu Mehmed Ağa b. el-Hâc Mehmed ve es-Seyyid el-Hâc Mehmed Ağa b. Ali şehâdetleriyle mahzar-ı hasm-ı câhidde sâbit olan es-Seyyid İbrahim Efendi b. es-Seyyid Ahmed müvekkili mezbûrun hasımları merkūmun muvâcehelerinde müvekkil-i mezbûr ebniye-i mezbûrede aslan ve kat‘an alâka ve medhalim kalmayıp menzil-i mezbûrun arsa ve ebniyesi evlâda meşrûtadır ebniye-i mezkûra müte‘allika âmme-i da‘vâdan cânib-i vakfı ve mezbûre Şerîfe Âişe Hatun’un zimmetini ibrâ-i âm ile ibrâ ve iskāt eyledim dedi dedikde mukırr-ı vekîl-i mezbûrun ber-vech-i muharrer ikrârını hasımları merkūmûn tasdîk eyledikleri İstanbul Mahkemesi’nden huzûr-ı âlîlerine i‘lâm olundu. Fî-29 min-Cemâziyelâhir sene [1]217