İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 418 Hüküm no: 488 Orijinal metin no: [71a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanaki v. Diga’nın nizama aykırı davranması sebebiyle bakkal esnaflığından çıkarıldığı Bakkāl esnâfına dâir ta‘ahhüd ilamı Ma‘rûz Âsitâne-i aliyyede vâki‘ bakkālân Pazarbaşısı Süleyman ve Bölükbaşı Ahmed ile Ustabaşı Aleksi ve Dimoka ve Zahraki ve Dimitri ve Astati ve Anderiko ve Yorgaki ve Nikola ve diğer Yorgaki ve âhar Nikola ve diğer Yanaki ve Espero ve Yani ve Kostandi ve âhar Dimitri ve diğer Anderiko ve Kosta ve Petro ve Aharyani vesâir mazbûtü’l-esâmî zimmîler meclis-i şer‘-i hatîrde yine esnâf-ı mezbûreden Yanaki v. Diga zimmî muvâcehesinde mersûm Yanaki zimmî kendi halinde kâr [u] kesbiyle meşgūl olmayıp nice müzevir umûra müdâhale ve dâimâ esnâfımız umûrunun ihtilâline bâdi olur harekâta mübâderet ve her birimizi birer vechile tekdîr ve ızrâra cüret üzere olduğundan mâ‘adâ hatta esnâfımızdan işbu hâzır bi’l-meclis Zahraki zimmîyi mücerred icrâ-yı garaz ve nefsâniyete mebni hilâf-ı inhâ iştikâ ile bir-takrîb bilâd-ı âhara nefy ve iclâ olunmasına bâ‘is ü bâdi ve bu def‘a dahi yine nefsâniyet-i sâbıkāsını tekrar icra kasdıyla mersûmun nefy ve iclâsına müeddî olur hâlâta ibtidâr üzere olmağla mersûmun bu vechile me’lûf olduğu etvâr ve harekâtından bir vechile hoşnûd ve râzılar olmadığımız ecilden esnâfımızdan cümlemizin ittifâkıyla tard ve ihrâc olunmak matlûbumuzdur deyü iştikâmıza mebni mersûm Yanaki zimmî fîmâ ba‘d me’lûf olduğu hâl-i nâ-marziyyeyi terk-birle kendi kâr u kesbiyle meşgūl olup aslan ve kat‘an umûr-ı esnâfa vazîfesinden hâric vesâir umûr ve husûsa müdâhale etmemek üzere ta‘ahhüd ve eğer hilâf-ı ahd harekete mütecâsir olur ise ma‘rifet-i şer‘le bâ-emr-i âlî vaz‘-ı kürek olunmasına râzı olmağla bizler dahi şürût ve kuyûd ile cünha-i sabıkasından akd ve iştikâmızı tehîr eyledik dediklerini mersûm Yanaki zimmî tasdîk ve vech-i meşrûh üzere ta‘ahhüd ve iltizâm eylediği İstanbul Mahkemesi’nden huzûr-ı âlîlerine i‘lâm olundu. Fî-selh-i Cumâdelâhıre sene [1]217