İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 419 Hüküm no: 489 Orijinal metin no: [71a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mühtedî Mehmed’in mürted olduğu ve şeran katli gerektiği Mürted-i mersûmun şer‘an katl olunması için i‘lâm Ma‘rûz İşbu takrîr derûnunda zikr olunduğu üzere târih-i i‘lâmdan iki buçuk ay mukaddem sekrân ve mecnûn olmayıp tammü’l-akl ve bâliğ olduğu hâlde Dîvân-ı âlide huzûr-ı âsafânelerinde bi’t-tav‘ ve’r-rızâ cemî‘-i edyân-ı bâtıladan teberrî ve ityân-ı kelimeteyn-i şehâdeteyn ile şeref-i İslâmla müşerref olup talebiyle Mehmed tesmiye olunduğu meclis-i şer‘-i hatîrde lede’t-tezkiye adl ve makbûlü’ş-şehâde idükleri ihbâr olunan kapı kethüdâsı Hüseyin odabaşı b. İbrahim bâb-ı âlî Tulumbacı Reisi es-Seyyid Ahmed Beşe b. Mehmed ve neferâtından es-Seyyid Mustafa Beşe b. es-Seyyid Ahmed ve Hüseyin Beşe b. Mehmed ve Feyzullah Beşe b. Abdullah nâm kimesneler şehâdetleriyle bi’l-muvâcehe vech-i vecih üzere sâbit olan bakkāl tâifesinden Kernişli? Anton nâm zimmî el-iyâzu bi’llâhi te‘âlâ yevm-i mezbûrede bir sa‘at mürûrunda İslâm’dan rücû‘ ile mürted olup târih-i mezbûrdan beri mahbûs olmağla sâdır olan fermân-ı âlîlerine imtisâlen kapı kethüdâsı merkūm kulları ma‘rifetiyle ihzâr ve istintak olundukda ben mecnûnum demekle istikşâf-ı hâl için birkaç gün mukaddem Molla Süleymâniye Dârü’ş-Şifâsına irsâl olunmağla Dârü’ş-şifâ Hekimbaşı Çelebi Mehmed Efendi ve Tımarhâneci Molla Mustafa b. Mehmed ve Küçük Mustafa b. Yahya nâm kimesneler ba‘de’n-nazar mürted-i mesfûrda eser-i cünûndan kat‘an bir nesne olmayıp tammü’l-akl olduğunu Çarşamba günü Dîvân-ı âlide huzûr-ı fâizi’n-nûr-ı âsafânelerinde ve ba‘dehû du‘âhânemizde ma‘kūd meclis-i şer‘-i münîrde bi’l-ittifâk haber vermeleriyle mürted-i mersûmun bi’d-defa‘ât şübhesi keşf ve imhâl olundukda bir vechile kabûl etmeyip irtidâdında ısrâr etmekle mûcebince mürted-i merkūmun emr-i veliyyü’l-emr ile katli meşrû‘ olduğu İstanbul Mahkemesi’nden huzûr-ı âlîlerine i‘lâm olundu. Fî-14 min-Receb sene [1]217