İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 420 Hüküm no: 490 Orijinal metin no: [71a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ebûbekir Reis b. Ömer’in, Avacı Vasil v. Nikola ile bedel-i sulh karşılığında anlaştığı 351 guruş 4 paradan 150 guruşa sulh Ma‘rûz Ashâb-ı sefâyînden derûn-ı arzuhâlde mezkûrü’l-ism Tophaneli Ebûbekir Reis b. Ömer bi’t-terâzi meclis-i şer‘-i hatîrde arzuhâl eden Avacı Vasil v. Nikola nâm zimmî muvâcehesinde târih-i i‘lâmdan iki ay mukaddem zimmî-i mesfûrun İstanbul kilesi olmak üzere bin yüz seksen altı keyl tuzunu medîne-i İzmir’de Âsitâne-i aliyyeye râkibe olduğum sefînem ile nakl için beker keyli yirmi dörder para ücret-i navl mukābelesinde sefînem vaz‘ ve tahmîl ve Âsitâne-i aliyyeye nakl ve teslîm etmemle mesfûrun zimmetinde ücret-i müsemmât-ı mezkûreden cem‘an bin yetmiş bir guruş yirmi dört paranın yedi yüz yirmi buçuk guruşunu bana def‘ ve teslîm etmekle bâkīsi olup el-yevm zimmetinde olan üç yüz elli bir guruş dört parayı mersûm Vasil zimmîden taleb ve da‘vâ eylediğimde ol dahi cevâbında İzmir kilesi olmak üzere ol mikdâr ücret-i navl mukābelesiyle ancak bin iki yüz keyl dokuz sefîne ki tahmîl ve Âsitâne’ye nakl etmişdik deyip ziyâdeyi inkâr-birle [71b] beynimizde ba‘de’l-münâza‘a bâ-vesâtet-ı muslihîn ben ber-vech-i muharrer tasaddî eylediğim da‘vâmdan bi’t-tav‘ ve’r-rızâ mesfûr Vasil zimmî ile yüz elli guruşa ba‘de akdi’l-musâlahati ve’l-kabûl bedel-i sulh-i mezkûrdan mâ‘adâ üç yüz elli bir guruş dört paraya varınca ziyâdesi olan iki yüz bir guruş dört paraya müte‘allika âmme-i da‘vâdan mesfûrun zimmetini kabûlü hâvi ibrâ ve iskāt eyledim deyü mukırr-ı mezbûrun bi’l-cümle takrîr-i meşrûhunu mersûm Vasil zimmî tasdîk ve ibrâdan müstesnâ bedel-i sulh-i merkūm yüz elli guruş zimmetinde müdde‘î-i mezbûra sahîhan deyni olduğunu kat‘iyyen ve tâyi‘an ikrâr u i‘tirâf etmeğin alâ-mûceb-i i‘tirâfihî meblağ-ı mezbûr yüz elli guruşun müdde‘î-i mezbûr Ebûbekir Reis’e bi’t-taleb edâsıyla mesfûr Vasil zimmî ilzâm olunduğu İstanbul Mahkemesi’nden huzûr-ı âlîlerine i‘lâm olundu. Fî-14 min-Receb sene [1]217