İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 421 Hüküm no: 491 Orijinal metin no: [71b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Ayşe bt. Halil’in, Mehmed Said Efendi b. Mehmed ile ev davasında bedel-i sulh karşılığında anlaştığı 100 guruşa menzil niza‘ından sulh Ma‘rûz İstanbul’da Silivrikapısı dâhilinde İbrahim Paşa Mahallesinde sâkine derûn-ı arzuhâlde mezkûretü’l-ism mu‘arrefetü’z-zât Şerîfe Âişe bt. es-Seyyid Halil nâm Hatun meclis-i şer‘-i münîrde mârru’z--zikr Silivrikapısı civârında Bali Ağa Mescid-i şerîfi İmâmı sâhib-i arzuhâl es-Seyyid Hâfız Mehmed Said Efendi b. Mehmed mahzarında zikr olunan İbrahim Paşa Mahallesi’nde vâki‘ bir tarafdan Ahmed Çavuş menzili ve üç tarafdan tarîk-i âm ile mahdûd ve müştemilât-ı ma‘lûmeyi hâvi bir bâb menzilin arsası ashâb-ı hayrâtdan müteveffâ Hasan Çelebi b. Uğurlu vakfından galle ve tevliyeti mescid-i şerîf-i mezbûrda imâm olanlara meşrûta senede yüz yirmi akçe mukāta‘a-i kadîmeli ve üzerinde olan bi’l-cümle ebniyesi mülk bir bâb menzili kayın pederim Ebûbekir Çavuş b. Mehmed ve zevcesi kayın vâlidem Emine bt. Hasan nâm Hatun’un ale’l-iştirâki’s-seviyy bâ-hüccet-i şer‘iyye yedlerinde mülkleri iken zevcân-ı mezbûrân müte‘âkiben fevt olduklarında menzil-i mezkûr hasran vârisi sulbî oğlu zevcim Mehmed Salih Efendi’ye mevrûs olup zevcim merkūm dahi fevt oldukda ben zevce-i menkûhası olmamla benimle sulbî sagīr oğlu Mehmed Sadullah’a mevrûs olup ve ben oğlum sagīr-i mezbûrun tesviye-i umûruna kıbel-i şer‘den mansûbe vasîsi olmamla sagīr-i mezbûrun menzil-i mezkûrdan gayri malı olmayıp zarûret-i nafakası için mesûğ-ı şer‘îye binâen menzil-i mezkûrun sekiz sehm i‘tibâriyle sagīr-i merkūmun yedi sehm hisse-i şâyi‘asını benim sümün hissem ile ma‘an semen-i misliyle âhara bey‘e kıbel-i şer‘den bâ-hüccet me’zûn olduğuma binâen menzil-i mahdûd-ı mezkûru bâ-hüccet semen-i ma‘lûma Bostani Abdülkādir b. Ahmed nâm kimesneye bi’l-asâle ve bi’l-vesâye bey‘ ve temlîk ve teslîm ve kabz-ı semen eylediğimden sonra merkūm Abdülkādir dahi menzil-i merkūmu semen-i ma‘lûm ve makbûza yine bâ-hüccet bana bey‘-i kat‘î ile bey‘ ve temlîk ve teslîm ben dahi iştirâ ve temellük ve tesellüm ve kabûl edip ol vechile menzil-i merkūm bi-cümletin mâ yeştemilühû ve yahvîhî müstakilleten yedimde mülk-i müşterâm olmuşken oğlum sagīr-i merkūm Sadullah bu esnâda fevt olmağla imâm-ı mezbûr menzil-i merkūmun arsa ve ebniyesi vakıf olmak zu‘muyla menzil-i merkūmu sagīr-i mezbûrun fevtinden bi’t-tevliye zabt murâd eder deyü da‘vâ ve imâm-ı merkūm dahi menzil-i merkūmun arsa ve ebniyesi vakıf olmağla sagīr-i merkūmun mahlûlünden bana âid olmağla meşrûtiyet üzere zabt murâdımdır deyip lâkin kırk seneden mütecâviz zamândan beri menzil-i mahdûd-ı mezkûrun ebniyesi tedâvül-i eyâdî ile müstenid-i şer‘îye binâen mülkiyet üzere zabt ve tasarruf oluna gelip ol vechile imâm-ı mütevellî-i mezbûrun vakfiyet da‘vâsının sübûtu müte‘assir belki müte‘azzir olmağla mezbûre Şerîfe Âişe Hatun rızâsıyla kat‘an li’n-nizâ‘ malından imâm-ı mütevellî-i mezbûra yüz guruş def‘ ve teslîm ol dahi ahz u kabz ve ke’l-evvel kadîmi üzere menzil-i merkūmun arsası senevî yüz yirmi akçe mukāta‘a-i mezkûre ile ve bi’l-cümle ebniyesi mülk olmak üzere mezbûre Şerîfe Âişe Hatun yedinde olan atîk temessük hâmişine tahrîr ve temhîr-birle kat‘-ı nizâ‘ eyledikleri İstanbul Mahkemesi’nden huzûr-ı âlîlerine i‘lâm olundu. Fî-min-Receb sene [1]217