İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 422 Hüküm no: 492 Orijinal metin no: [71b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Despino bt. Kostandin’in, Tanaş v. Hristo ve Pavli aleyhine açtığı alacak davasının reddedildiği Mu‘ârazadan men‘ Ma‘rûz Sâhibe-i arzuhâl mu‘arrefetü’ş-şahs Despino bt. Kostandin nâm Nasrâniye meclis-i şer‘-i hatîrde bozacı tâifesinden derûn-ı arzuhâlde merkūmü’l-ism Tanaş v. Hristo ve Pavli v. Pavli nâm zimmîler muvâcehelerinde İstanbul’da Topkapı dâhilinde Hisardibi nâm mahalde vâki‘ bir bâb bozahâne derûnunda mevcûde beyne’l-hıref gedik tâ‘bir olunur âlât-ı lâzıme-i ma‘lûme damadım Yorgi v. Hristo nâm zimmînin müstakillen yedinde mülkü iken târih-i i‘lâmdan yedi gün mukaddem âlât-ı lâzıme-i ma‘lûmenin tasdîkini mersûm Tanaş zimmî ile şerîki diğer Yorgi v. Estera zimmîlere altı yüz elli guruşa ve rub‘unu mersûm Pavli zimmîye üç yüz yirmi beş guruşa ve mâ‘adâ rub‘-ı âharını dahi Anaştaş v. Yorgi zimmîye kezâlik üç yüz yirmi beş guruşa bâ-hücec-i şer‘iyye bey‘ ve temlîk ve teslîm ve semenleri olan cem‘an bin üç yüz guruşu kabz ve karar edip lâkin damadım gāib-i mersûm mukaddemâ gedik tâ‘bir olunan âlât-ı lâzıme-i merkūmeyi âhardan iştirâ ve tanzîm eylediği esnâda benden üç yüz guruşu iktirâz ve kabz edip gedik-i mezkûr levâzımına sarf eylediğinden mâ‘adâ on guruş kıymetli bir kazganımı dahi alıp meblağ-ı mezbûru ve gerek kazgan-ı merkūmu bana edâ ve teslîm etmeksizin firâr etmekle meblağ-ı mezbûr üç yüz guruş ile kazgan-ı merkūmun kıymetini mersûmân Tanaş ve Pavli zimmîler mücerred gedik-i mezkûru ber-vech-i muharrer iştirâ eylediklerine binâen mallarından bana zâmin olsunlar deyü mukırra-i müdde‘iye-i mesfûrenin takrîr-i meşrûhu üzere tasaddî eylediği da‘vâsı mesmû‘a ve iltifâta şâyân olmamağla zimmîyân-ı mersûmâna şer‘an suâl dahi teveccüh etmeyip bî-vech mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî-19 min-Receb sene [1]217