İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 423 Hüküm no: 493 Orijinal metin no: [71b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Mehmed Emin’in, Sultan Abdülhamid Han vakfından icareli bir bab kasap dükkânı gediğini Mehmed b. İsmail’e devrettiği Kassâb Ma‘rûz Hüdâvendigâr-ı sâbık merhûm cennet-mekân firdevs-âşiyân Sultan Abdülhamid Hân —aleyhi’r-rahmeti ve’l-Gufrân— hazretlerinin evkāf-ı hümâyûnlarından Yedikule hâricinde vâki‘ ganem selhhânelerinden yedinci selhhâneye merbût kasab dükkânlarından Ayasofya’da nalbant dükkânı ittisâlinde vâki‘ bir bâb kasab dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmenin nısfına vakf-ı müşârun-ileyh mütevellîsi temessüküyle mutasarrıf olan Hüseyin b. el-Hâc Mehmed Emin meclis-i şer‘-i münîrde hâssa kasabbaşısı İzzetlü Mustafa Ağa tarafından mürsel kethüdâ vekîli el-Hâc Hâfız Mehmed Emin Ağa vesâir kasab ustaları hâzır oldukları hâlde kasab ustalığını idâreye kādir idüğü ihbâr olunan bâ‘isü’l-i‘lâm Mehmed b. İsmail muvâcehesinde takrîr-i kelâm edip âlât-ı lâzıme-i mezkûreden mutasarrıf olduğum nısf hisse-i şâyi‘amı hüsn-i rızâmla bedel-i ma‘lûm ve makbûz mukābelesinde bâ-re’y-i mütevellî merkūm Mehmed’e ferağ-ı kat‘î-i mu‘teber ile ferağ ve tefvîz eylediğimde ol dahi tefevvüz ve kabûl edip ba‘de’l-yevm âlât-ı [72a] lâzıme-i merkūmenin nısfı mezbûr Mehmed’in hakk-ı müfevvezi olan benim kat‘an alâka ve medhalim kalmamışdır dedikde merkūm Mehmed tasdîk etmeğin nısf-ı âlât-ı mezkûre fâriğ-i merkūm Hüseyin’in ferağından mezbûr Mehmed üzerine tahrîr ve defter-i vakf-ı şerîfe ba‘de’l-kayd yedine temessük i‘tâsını istid‘â eylediği İstanbul Mahkemesi’nden huzûr-ı âlîlerine i‘lâm olundu. Fî-19 min-Receb sene [1]217