İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 424 Hüküm no: 495 Orijinal metin no: [72a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamamcı Abkar v. Soğom’un evinin altına mahzen kazarken, Serkiz v. Kiragos’un duvarına zarar verdiği ve birbirlerinin zararını tazmin edeceklerini taahhüt Keşif Ma‘rûz Sâdır olan fermân-ı âlîlerine imtisâlen kıbel-i şer‘i enverden irsâl olunan Kâtib Salih Efendi hâssa mi‘mârı hulefâlarından Mustafa ve İbrahim Edhem halîfeler ile İstanbul’da Gedikpaşa civârında Dîvân-ı âlî Mahallesi’nde vâki‘ münâza‘un fîh olan Kapamacı Serkiz v. Kiragos nâm zimmî ile zevcesi Serpohi Nasrâniyenin mütemekkin oldukları menzile varıp huzûr-ı Müslimînde akd-i meclis-i şer‘-i kavîm eyledikde arzuhâl eden mersûm Kapamacı Serkiz ve zevcesi mu‘arrefetü’ş-şahs mersûme Serpohi bt. Abraham nâm Nasrâniye meclis-i ma‘kūd-ı mezkûrda zikri âtî vakfın mütevellîsi Mehmed Nuri Efendi tarafından vekîli kâtib-i vakıf es-Seyyid Mehmed Emin Ağa hâzır olduğu hâlde câr-ı mülâsıkları derûn-ı arzuhâlde merkūmü’l-ism Hammâmî Abkar v. Sogomon nâm zimmî muvâcehesinde işbu derûnunda akd-i meclis olunan merhûm Davud Çavuş vakfından ale’l-iştirâk bi’l-îcâreteyn mutasarrıf olduğumuz bir bâb menzilimizin duvarı yine vakf-ı mezbûrdan mersûm Abkar zimmînin bi’l-îcâreteyn mutasarrıf olduğu menzili duvarına muttasıl olup lâkin mersûm Abkar zimmî bu esnâda menzili tahtına zîr-i zemîn mahzen hafr ve bizim menzilimize mülâsık olan duvarı hedm murâd edip hedm eylediği sûretde bizim mutasarrıf olduğumuz menzilimizin duvarları külliyen harâb ve hâlâ bir mikdârı dahi hedme mâil olmağla ba‘de’l-keşf ve’l-mu‘âyene zararı men‘ ü def‘ olunmak matlûbumuzdur deyü da‘vâ ol dahi cevâbında müdde‘iyân-ı mersûmânın mârru’z--zikr duvarlar benim duvarım üzerine mâil olduğundan mâ‘adâ menzilleri tahtında olan mahzeni kapısı benim temel duvarlarım üzerinde olmağla zararları men‘ olunmak benim dahi murâdımdır dedikde beynlerine muslihûn tavassut edip müdde‘iyân-ı zevcân-ı mesfûrân mersûm Abkar zimmî tarafında hedme mâil olan duvarlarını sokak yüzünden bahçesi nihâyetine varınca müceddeden binâ ve mersûm Abkar zimmî dahi müdde‘iyân-ı mersûmân tarafında olan duvarı üzerinde olan mahzen kapısını rızâsıyla alâ hâlihî terk edip her biri âharın vukū‘ bulan zararlarını def‘a ta‘ahhüd ve bu vechile kat‘-ı nizâ‘ eylediklerini Mevlânâ-yı mezbûr mahallinde ketb ve tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr eylediği İstanbul Mahkemesi’nden huzûr-ı âlîlerine i‘lâm olundu. Fî-16 min-Receb sene [1]217