İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 425 Hüküm no: 496 Orijinal metin no: [72a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esnafdan olmayan Mehmed Emin ve Hafız Mehmed’in kabahasır satamayacakları Kabahasırcı esnâfına dâir i‘lâm Ma‘rûz Âsitâne-i aliyyede vâki‘ Hasır iskelesinde kabahasır bey‘ u şirâsıyla me’lûf olan esnâfdan Molla İbrahim ve el-Hâc Mustafa ve el-Hâc Ahmed nâm kimesneler meclis-i şer‘-i münîrde yine esnâf-ı mezbûreden es-Seyyid el-Hâc Mehmed Emin ve es-Seyyid Hâfız Mehmed muvâcehelerinde kadîmden beri Bandırma’dan ve Tuna sevâhilinden her birimiz müstakillen kendi malımız ile kaba hasır iştirâ ve Âsitâne-i aliyyeye nakl ve dükkânlarımıza vaz ve râyici üzere ehven bahâ ile ibâdullâha bey‘ oluna gelip ve ba‘zen dahi mellâh tâifesi vesâir rencber makūlelerinin ticâret tarîkiyle getirdikleri kaba hasırları kethüdâ ve ustalar ma‘rifetiyle değer bahasıyla iştirâ ve beynimizde ale’s-seviyye tevzî‘ ve taksîm ve râyici vechi üzere ibâdullâha ve cevâmi‘ ve mesâcid için mutkezî olanlara bey‘ ve fürûht ve bu vechile her birimiz ta‘ayyüş edegelmişken bu esnâda esnâfımızdan mezbûrân es-Seyyid el-Hâc Mehmed Emin ve es-Seyyid Hâfız Mehmed’den her biri tütüncü vesâir kâr u kesbiyle meşgūl olup mahallerinden zikr olunan kabahasırı iştirâ ve celb etmediklerinden nâşî bizim taşradan müstakillen malımız ile iştirâ ve celb eylediğimiz kabahasırları dükkânımıza vaz‘ vesâirlerinden birkaç para noksan olarak ibâdullâha ehven bahâ ile bey‘ eder iken vech-i meşrûh üzere bey‘imize râzılar olmayıp mârru’z--zikr [72b] kaba hasır bize mahsûs meta‘ımızdır beynimizde ale’s-seviyye tevzî‘ ve taksîm ederiz herbirimize hisse veriniz deyü bizi tazyîk ve bey‘ u şirâdan men‘ ile diledikleri gibi beynlerinde fiyat vaz‘ıyla ibâdullâha gāli bahâ ile bey‘ irâdesinde olmalarıyla bu hâlet ihtikârı mûceb olmağla bî-vech mümâna‘atları men‘ ü def‘ olunmak matlûbumuzdur deyü da‘vâ onlar dahi kaziyye minvâl-i muharrer üzere olduğunu her biri tasdîk etmeleriyle mezbûrânın ber-vech-i muharrer mümâna‘atları hilâf-ı şer‘-i şerîf ve netîcesi inhisâr-ı bey‘ u şirânın men‘i bâbında şeref-yâfte-i sudûr olan hatt-ı hümâyûn-ı sa‘âdet-redîfin mugāyiri olduğu mezbûrâna tefhîm ve fîmâ ba‘d vech-i meşrûh üzere kabahasır bize mahsûs metâ‘ımız olmağla beynimizde ale’s-seviyye tevzî‘ ve taksîm olunmak irâdesiyle bize hisse veriniz deyü bî-vech rencîde olunmayıp ihtikârı mûceb olur hâlâta tasaddî etmemek üzere mezbûrâna tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî-19 min-Receb sene [1]217