İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 426 Hüküm no: 497 Orijinal metin no: [72b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Emin b. İbrahim’in vârisleri ile Hamza Usta b. Hüseyin’in birbirlerinin zimmetini ibrâ ederek sulh oldukları Gabn-i fâhiş da‘vâsından 60 guruşa sulh Ma‘rûz Habbâzân tâifesinden olup medîne-i Üsküdar’da İhsaniye Mahallesinde sâkin iken bundan akdem fevt olan el-Hâc Mehmed Emin b. İbrahim’in verâseti zevce-i metrûkesi Emine bt. Hasan nâm Hatun ile sulbî evlâd-ı kibârı es-Seyyid İbrahim Edhem ve Şerîfe Hatice ve Şerîfe Cemile’ye münhasıra ve mesele-i mirâsları otuz iki sehmden olup dört sehmi zevce-i mezbûreye ve on dört sehmi oğlu mezbûr es-Seyyid İbrahim Edhem’e ve yedişer sehmi kızları mezbûretândan her birine isâbeti tahakkukundan sonra sâhib-i arzuhâl es-Seyyid İbrahim Edhem meclis-i şer‘-i münîrde habbâz tâifesinden derûn-ı arzuhâlde mezkûrü’l-ism Hamza Usta b. Hüseyin nâm kimesne muvâcehesinde Galata’ya muzâfe kasaba-i Tophane’de yamalı fırın demekle ma‘rûf bir bâb ekmekçi fırını ve ona merbût Galata’da Tophane kapısı dâhilinde kâin dört horoslu bir bâb değirmen derûnlarında mevcûde beyne’l-hıref gedik tâ‘bir olunur on altı bârgir ve sâir âlât-ı lâzıme-i ma‘lûmelerin altı bârgir hisse-i şâyi‘ası babam müteveffâ-i mezbûrdan benimle verese-i sâire-i mezbûrelere mevrûs yedimizde mülkümüz iken ben hisse-i mezkûrede bir i‘tibâr-ı mezkûr irsen mâlik olduğum on dört sehm hisse-i şâyi‘amı sene-i sâbıkā Cumâdelâhıresi’nin sekizinci günü mezbûr Hamza Usta’ya bi-safkatin vâhidetin sekiz yüz guruşa bâ-hüccet bey‘ ve temlîk ve teslîm ol dahi iştirâ ve kabz ve kabûl eyledikden sonra semen-i merkūmun elli guruşunu bana teslîm ben dahi kabz edip bâkīsi olan yedi yüz elli guruşu babam müteveffâ-i mezbûrun bâ-defter-i müfredât cânib-i mîrîye ve ma‘lûmü’l-esâmî tüccâra olan düyûnundan benim hisseme isâbet eden yedi yüz elli guruşa takāsan kabzına me’mura ve ashâb-ı düyûna edâ ve teslîm etmek üzere müşteri-i mezbûr Hamza Ustaya emr ve tarafımdan tevkîl eylediğimde ol dahi kabûl ve ber-vech-i muharrer edâya ta‘ahhüd edip mebî‘-i mezkûrun tağrîr ve gabnine müte‘allika âmme-i da‘vâdan her birimiz âharın zimmetini kabûlü hâvi ibrâ ve iskāt etmişdik lâkin babam müteveffâ-i mezbûrun ol mikdâr düyûnu olmadığından mâ‘adâ bey‘-i mezkûr tağrîr ve gabn-ı fâhiş ile olmuşdu deyü da‘vâya tasaddî eylediğimde merkūm Hamza Usta baban müteveffâ-i merkūmun vech-i meşrûh üzere bâ-defter-i müfredâd düyûnundan hissesine isâbet edip mukır ve mu‘terif olduğun meblağ-ı mezbûr yedi yüz elli guruş deyni emrinle habbâzân ustaları ma‘rifetiyle cânib-i mîrîye ve ashâb-ı düyûna tamamen edâ ve teslîm etmişdim deyip ve vech-i muharrer üzere edâ ve teslîmi habbâzân kethüdâsı Mustafa b. Abdullah ve Mehmed Usta’nın alâ-tarîkı’ş-şehâde ihbârlarıyla mütehakkık olduğundan gayri ber-minvâl-i muharrer tağrîr-i gabn da‘vâsından dahi mukaddema ibrâ eylediğimi mukır ve mu‘terif iken tasaddî eylediğim da‘vâ-yı mezkûrem şer‘an mesmû‘a olmadığı bana tefhîm olundukdan sonra merkūm Hamza Usta fakr-ı hâlime merhameten rızâsıyla malından teberru‘an bana altmış guruş verip ben dahi kabz ve istihlâk etmemle bi’l-cümle hukūk-ı şer‘iyyeye müte‘allika âmme-i da‘vâdan ve kâffe-i mütâlebâtdan merkūm Hamza Usta’nın zimmetini ol dahi bana medfû‘u olan meblağ-ı müstehlek-i merkūmun istirdâdına müte‘allika da‘vâdan benim zimmetimi her birimiz şürût-ı müfside ve uhûd-ı mübtileden âri ve cebr ve kerhden hâli ibrâ-yı âmm-ı sahîh-i şer‘î ile ibrâ-i kabûlü hâvi ve iskāt eyledik dedikde mezbûr Hamza Usta dahi tasdîk eylediği İstanbul mahkemesinde ba‘de’t-tescîl huzûr-ı âlîlerine i‘lâm olundu. Fî-19 min-Receb sene [1]217