İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 427 Hüküm no: 498 Orijinal metin no: [72b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kandil gecesinde cami ve mescitlerin minarelerinden kandil yakılması İkād-ı kanâdil Ma‘rûz İstanbul kādısı faziletlü efendi i‘lâmınız mûcebince leyle-i merkūmede îkād-ı kanâdil olunması iktizâ edenlere tenbîh eyleyesiz deyü buyruldu. Fî-26 min-Receb sene [1]217 Ma‘rûz Dergâh-ı cihan-metâ‘ ve bârgâh-ı sipehr-i irtifâ‘a ma‘rûz-ı abd-i dâ‘î-i adîmü’l-istitâ‘alarıdır ki cenâb-ı Hazret-i Resûlü’s-sakaleyn vâsıl-ı sermenzil-i kâb-ı kavseyn ol yektâ süvvâr-ı serhayl-kerde-i enbiyâ-i sipehsâlâr Subhânellezî esrâ Habîb-i Hüdâ Şefî-i rûz-ı cezâ Ebi’l-Kasım Muhammed Mustafa —aleyhi efdâli’s-salavât ve ezka’t-tahâyâ— hazretlerinin Mi‘râc-ı pür ibtihâcları vâki‘ olduğu işbu mâh-ı Receb-i şerîf gurresi hâlâ bi’r-rü’ye sâbit olmayıp şehr-i Cumâde’s-sânîye selâsin ile itmâm ve mâh-ı mübârek-i merkūma yevm-i Cuma ibtidâ-yı i‘dâd-ı eyyâm olduğuna binâen işbu yirmi yedinci Çarşamba gecesi olmağla âdet-i hasene-i devlet-i aliyye ve dîdne-i müstahsene-i saltanat-ı seniyye üzere minârât-ı cevâmi‘-i câmi‘atü’l-berekât îkād-ı kanâdil ile tenvîr ve ol vechile tebcîl ve tevkīr olunmağla bi’l-cümle kulûb-ı müminîn safa-rehin ve neşât-karîn olmaları için selâtîn-i âlişân —nevvarallâhu merâkadehum bi-envâ‘ri’l-Gufrân ve’l-ihsân— hazerâtı cevâmi‘-i şerîfeleri kayyımlarına bâ-fermân-ı âlî tenbîh olunmak iktizâ eylediği İstanbul Mahkemesi’nden dergâh-ı felek-medâr ve bârgâh-ı gerdûn i‘tibârları türâbına i‘lâm olundu. Fî-23 min-Receb sene [1]217