İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 428 Hüküm no: 499 Orijinal metin no: [72b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Hüseyin’in kocası Attar Feyzullah b. Ömer’den muhâlaa yolu ile boşandığı Muhâla‘a ve ibrâ Ma‘rûz İstanbul’da Haydarpaşa kurbünde Bıçakçı Alâeddin Mahallesinde sâkine tahmînen on dört yaşında sin ve cüssesinin bülûğa tahammülü ve bülûğunu mu‘terife olan sâhibe-i arzuhâl mu‘arrefetü’z-zât Hatice bt. Hüseyin meclis-i şer‘-i münîrde zevc-i muhâlı‘ı derûn-ı arzuhâlde mezkûrü’l-ism Attâr Feyzullah b. Ömer mahzarında mezbûr Feyzullah zevc-i dâhilim olup beynimizde hüsn-i muâşeretimiz olmamağla zimmetinde mütekarrir ve ma‘kūdun aleyh mehr-i müeccel hakkım olan yetmiş beş guruş ve hîn-i akd-i nikâhda mu‘accel tesmiye olunup henüz bana vermemekle şer‘an vasatları yâhud vasatlarının kıymetleri lâzım gelen keten memlû şiyâk sekiz yastık ve üç minder ve bir çift döşek ve bir baş yastığı ve bir yorgan ve üç şiyâk mak‘ad ve iki tencere ma‘a kapak ve dört sahan ve bir tas ve bir tâbe ve bir leğen ma‘a ibrik ve bir tepsi ve bir şam‘dân ve bir iskemle ma‘a firâş ile nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere bi’t-tav‘ ve’r-rızâ zevcim mezbûr ile muhâla‘a-i sahîh-i şer‘î ile hul‘ olduğumda ol dahi [73a] hul‘-ı mezkûru ba‘de’l-kabûl hukūk-ı zevciyete ve ibtidâ-yı zevciyetden işbu târih-i i‘lâma gelince sâir beynimizde cereyân eden cemî‘-i hukūk-ı şer‘iyyeye müte‘allika mutallakan âmme-i de‘âvî ve kâffe-i mütâlebâtdan her birimiz âharın zimmetini ibrâ-i âmm-ı sahîh-i şer‘î ile ibrâ ve iskāt ve her birimiz ber-minvâl-i muharrer âharın ibrâsını kabûl eyledik dedikde mezbûr Feyzullah dahi tasdîk eylediği İstanbul mahkemesinde ba‘de’t-tescîl huzûr-ı âlîlerine i‘lâm olundu. Fî-24 min-Receb sene [1]217