İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 431 Hüküm no: 501 Orijinal metin no: [73a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kiracı Halil Beşe b. Abdullah’ın firar etmesi sebebiyle çubukçu dükkânının boşaltıldığı Çubukçu dükkânı küşâdı Ma‘rûz İstanbul’da Vezirhanı karşısında kahveci dükkânı ittisâlinde vâki‘ sâhibetey-i arzuhâl Şerîfe Hatice bt. Mehmed Said ile Râbia bt. Abdullah’ın bi’l-îcâreteyn mutasarrıfe oldukları bir bâb çubukçu dükkânında müstecirleri olan Çubukçu Halil Beşe b. Abdullah on üç aydan mütecâviz zamândan beri dükkân-ı mezkûru mukaffelen terk ve firâr ve gaybet-i münkatıa ile gāib olup dükkân-ı mezkûr mu‘attal kalmağla dükkân-ı mezkûr ma‘rifet-i şer‘le feth ve küşâd ve derûnunda mevcûd bulunan eşyâsı yed-i emine vaz‘ ve dükkân-ı mezkûr kendilere teslîm olunmasını iltimâs etmeleriyle sâdır olan fermân-ı âlîlerine imtisâlen kıbel-i şer‘-i enverden mürsel Kâtib Süleyman Efendi mazbûtü’l-esâmî Müslimîn hâzır oldukları hâlde dükkân-ı mezkûrun kilidini feth ve küşâd ve derûnunda mevcûd bulunup gāib-i mezbûrun malı olan eşyâsı yüz yirmi sagīr kerrâs çubuğu ve iki yaş imâmeli çubuk ve bir kehribâr imâmeli çubuk ve on beş kermişe çubuk ve bir eğe ve bir portakal tâbesi ve bir tel kafes [73b] ve üç destgâh ve bir peştahta ve dört arda ve bir çekiç ve bir testere ve bir çubuk doğrultucak ve beş matkab ve bir iskemle ve seksen beş müsta‘mel çubuk ve bir bıçak ve iki keman ve bir çubuk delecek ve bir örsünü mu‘temed ve müstakīm olduğu ihbâr olunup kıbel-i şer‘den kayyım nasb olunan Mustafa Ağa b. Feyzullah’a teslîm eylediğini ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr eylediği tescîl ve huzûr-ı âlîlerine i‘lâm olundu. Fî-25 min-Receb sene [1]217