İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 431 Hüküm no: 502 Orijinal metin no: [73b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lütfullah Ağa b. Abdülaziz’in, Dimitri’deki kahve semeninden alacağını kefaletinden dolayı Espir v. Yavan’ın bir yıl içerisinde ödeyeceği 3.125 guruş 5 para kahve semeni kefâletine binâen bir sene tamamında edâya tenbîh Ma‘rûz Tüccârdan el-Hâc Lütfullah Ağa b. Abdülazîz nâm kimesne Çarşamba günü arz odasında huzûr-ı âsafânelerinde ma‘kūd meclis-i şer‘-i münîrde dellâl tâifesinden Mosi v. Nebeto nâm Yahûdi hâzır olduğu hâlde İstanbul’da Zindânkapısı dâhilinde yarımhanda mütemekkin celeb tâifesinden sâhib-i arzuhâl İspir v. Yavan nâm zimmî muvâcehesinde mersûm İspir zimmînin oğlu gāib ani’l-beled Dimitri nâm zimmî târih-i i‘lâm senesi Rebî‘ülâhirinin on dokuzuncu günü beher kıyyesi üçer buçuk guruşa olmak üzere hâzır-ı Yahûdi-i mersûm vesâtetiyle malımdan ve yedimden iştirâ ve kabz eylediği bin yüz yetmiş yedi buçuk vakıyye kahvenin semeni olan cem‘an dört bin yüz yirmi bir guruş beş parayı târih-i mezkûrdan beher şehr biner guruş verip ol vechile muksitan edâ etmek üzere te’cîl ve müşteri-i mersûmu tekfîl için dellâl-ı hâzır Yahûdi-i mesfûru tarafımdan tevkîl ve ma‘an irsâl eylediğimde babası işbu mersûm İspir zimmî Yahûdi-i mesfûr muvâcehesinde oğlu mersûm Dimitraki’nin cihet-i mezkûreden bana deyni olan meblağ-ı muksiteye mezbûra kefâlet-i mutlaka-yı sahîha ile kefîl ve zâmin olup Yahûdi-i mesfûr dahi bi’l-vekâle zimmî-i mersûmun kefâletini kabûl edip el-hâletü hâzihi üç mâh mürûr etmekle meblağ-ı mezbûrdan ber-vech-i meşrûh taksîtleri hulûl eden üç bin guruşu hâlen ve mâ‘adâsını dahi ecel-i mezkûr hulûlünde kefâletine binâen mersûm İspir zimmîden taleb ederim deyü Yahûdi-i hâzır-ı mesfûrun tasdîkiyle da‘vâ eylediğimde ol dahi ber-vech-i muharrer müdde‘âmı bi-tamâmihî tâyi‘an ve kat‘iyyen ikrâr u i‘tirâf edip lâkin meblağ-ı mekfûlün bih-i merkūmu hâlen ve def‘aten edâya kudretim yokdur deyü benden istimhâl etmekle ben dahi deyn-i meblağ-ı mezbûr dört bin yüz yirmi bir guruş beş parayı târih-i i‘lâmdan bir sene tamamına değin bana edâ ve i‘fā etmek üzere kefîl-i mesfûru rızâmla imhâl ve te’cîl eyledim dediğini mersûm İspir zimmî tasdîk eylediği İstanbul mahkemesinde ba‘de’t-tescîl huzûr-ı âlîlerine i‘lâm olundu. Fî-220 min-Receb sene [1]217