İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 432 Hüküm no: 503 Orijinal metin no: [73b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hristo v. Yorgi’nin devatçı esnaflığından çıkarılması Hristo zimmîyi devatçı esnâfından külliyen ihrâc Ma‘rûz Âsitâne-i aliyyede Sultan Bayezid-i Veli Han Câmi‘-i şerîfi kurbünde ve medîne-i Üsküdar’da vâki‘ devatçı esnâfının kethüdâsı es-Seyyid el-Hâc Mustafa ve yiğitbaşı Ahmed ve müsin [ve] ihtiyâr ustalarından İbrahim ve Osman ve Salih ve Abdullah ve İsmail ve Ali ve Ahmed ve Hüseyin Usta ve Memiş ve diğer İbrahim ve âhar Ali ve Mehmed ve Abdullah Usta ve diğer Memiş ve Halil vesâirleri meclis-i şer‘de İstanbul’da kırk dört kapısı civârında Çukurçeşme nâm mahalde mütemekkin fi’l-asl sandalcı esnâfından Hristo v. Yorgi nâm zimmî muvâcehesinde feth-i hâkānîden beri devatçılık san‘atına tâife-i Nasârâdan bir ferdin ta‘arruzu olmayıp ve husûs-ı merkūmun bu ana değin esnâfımızda vukū‘u mesbûk değil iken san‘atımızda kat‘ân alâkası olmayan mersûm Hristo zimmî bu esnâda kadîme mugāyir san‘atımıza taklîd ile abanosdan devat tasni‘ine mütecâsir ve kal ve redî olarak tasnî‘ eylediği devatı ibâdullâha gāli bahâ ile bey‘ ve ol vechile ibâdullâh mağbûn ve mütezarrır olduklarından mâ‘adâ mesfûrun bu makūle harekâta ictisârı ihtilâl-i nizâm-ı kadîmimizi mûceb olmağla zimmî-i mersûm kemâ-fi’s-sâbık sandalcılık san‘atıyla meşgūl olup kadîmden beri ehl-i İslâm’a mahsûs olan devatçılık san‘atına müdâhale etmemek üzere tenbîh olunmak cümlemizin murâdımızdır dediklerinde mersûm Hristo zimmî dahi fîmâ ba‘d zikr olunan devatçılık san‘atına ta‘arruz etmeyip kendi âhar kâr u kesbiyle meşgūl olmak üzere huzûr-ı şer‘de esnâf-ı mezbûre muvâcehelerinde ta‘ahhüd ve eğer ba‘de’l-yevm hilâf-ı ahidde harekete cesâret eder ise ma‘rifet-i şer‘le tedîb olunmasına râzı olup bu vechile kat‘-ı nizâ‘ eyledikleri İstanbul Mahkemesi’nden huzûr-ı âlîlerine i‘lâm olundu. Fî-26 min-Receb sene [1]217