İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 433 Hüküm no: 504 Orijinal metin no: [73b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ahmed ve kız kardeşi Ayşe Hatun’un evlerine izinsiz ihdas ettikleri tahta-pûşu kaldırmaları gerektiği Tahtapûş men‘ olunup keşif i‘lâmı Ma‘rûz Sâdır olan fermân-ı âlîlerine imtisâlen savb-ı şer‘-i enverden me’zûnen irsâl olunan Kâtib Hâfız Mehmed Tahir Efendi hâssa mi‘mârı hulefâsından es-Seyyid Hüseyin ve Mustafa halîfeleri ile İstanbul’da Hocapaşa Mahallesi’nde vâki‘ derûn-ı arzuhâlde mezkûrü’l-ism el-Hâc Ahmed ve kız karındaşı Âişe Hatun veledi Hüseyin’in ale’l-iştirâki’s-seviyy bi’l-îcâreteyn mutasarrıflar oldukları menzile varıp huzûr-ı Müsliminde akd-i meclis-i şer‘-i âlî ettikde menzil-i mezkûr ittisâlinde vâki‘ bir bâb menzile mutasarrıf ve derûnunda sâkin olan hâcegân-ı dîvân-ı hümâyûndan sâhib-i arzuhâl Hüsnü Hüseyin Efendi b. Abdullah’ın birâderi ve tarafından husûs-ı âtîde vekîl olduğu Mehmed Ağa b. Mustafa ve Hasan b. Abdullah şehâdetleriyle sâbit olan Ali Necib Efendi meclis-i ma‘kūd-ı mezkûrda mezbûrân el-Hâc Ahmed ve zâtı mu‘arrefe Âişe Hatun muvâcehelerinde zikri âtî vakfın mütevellîsi Ebûbekir Ağa b. Abdullah tarafından vekîl-i mürseli Câbi İsmail Efendi b. Mustafa hâzır olduğu hâlde mezbûrân el-Hâc Ahmed ve Âişe Hatun ashâb-ı hayrâtdan merhûm defterdâr-ı esbak Derviş Mehmed Efendi vakfı musakkafâtından bi’l-îcâreteyn mutasarrıflar oldukları menzili damı üzerine bilâ-izn-i mütevellî müceddeden tahta-pûş binâsı ile icrâsıyla na‘lınlarını vaz‘ ve kirişlerin çekip binâsına şürû‘ etmeleriyle tekmîl olunduğu sûretde müvekkilim mezbûrun yine vakf-ı mezbûrdan mutasarrıf olduğu menzilinin makarr-ı nisvân olan mahallerine nezâreti olup ve bu makūle tahta-pûş binâsı bâ-emr-i âlî memnû‘âtdan olmağla men‘ ü def‘ olunmak bi’l-vekâle matlûbumdur deyü da‘vâ eyledikde fi’l-hakīka zikr olunan tahta-pûş inşâ olundukda müdde‘i-i müvekkil-i mezbûrun makarr-ı nisvân olan mahalline nezâreti olacağı ve bu makūle tahta-pûş binâsı emr-i âlî memnû‘âtdan olduğu mi‘marân-ı mezbûrân vesâir sikāt-ı Müslimîn haber verdiklerini kâtib-i merkūm mahallinde ketb ve tahrîr ve ma‘an ba‘s olunan ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mezbûrân el-Hâc Ahmed ve kız karındaşı Ayşe’nin hilâf-ı emr-i âlî ihdâs edecekleri tahta-pûşun men‘i bâbında emr u fermân hazret-i veliyyü’l-emrindir. Fî-29 Receb sene [1]217