İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 434 Hüküm no: 505 Orijinal metin no: [74a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Angeli zımmi’nin kazzaz esnaflığından çıkarılması Kazzâz esnâfından ihrâc Ma‘rûz Âsitâne-i aliyye ve tevâbi‘inde olan bilâd-ı selâsede vâki‘ kazzâz esnâfının kethüdâsı el-Hâc Mehmed Ağa ve bürüncükcüler kethüdâsı Mehmed ve dolabcılar kethüdâsı vekîli Ahmed ve Said ile zimmî ustalarından Asvadar ve Panço ve Akna ve Karabet ve Kigork ve Manol ve Yanako ve Artin vesâirleri meclis-i şer‘-i münîrde her biri takrîr-i kelâm ve ifâde-i merâm edip biz kazzâz esnâfından olup i‘mâl ve bey‘ eylediğimiz gaytan ve şerit vesâir emti‘amız has olarak ta‘ahhüdümüz vechi üzere ibâdullâha ehven bahâ ile bey‘ ve ol vechile ta‘ayyüş edegelmişken bu esnâda esnâfımızdan Angeli nâm zimmî İstanbul’da kalpakçılar başında kazzâz sûkunda kâin dükkânında nizâm-ı kadîmimize mugāyir kalb ve redî metâ‘ını hasdır diyerek ibâdullâha bey‘ ve füruht eylemesi ibâdullâhın mağbûn ve mütezarrır olmalarına bâ‘is ve san‘atımızın ihtilâline bâdi olmağla esnâf ma‘rifetiyle lonca odasında kendiye tenbîh ve tekîd eylediğimizde kat‘an itâ‘at ve ısgā etmeyip ısrârından ısrâr olunduğuna binâen ma‘rifet-i şer‘le tenbîh ve tedîb irâdesiyle taraf-ı şer‘den mübâşir irsâl eylediğimizde ben taranda burak bandırası altında himâyedeyim deyü adem-i itâ‘at-birle ızhâr-ı huşûniyyet eylediğine binâen hâlâ reisü’l-küttâb sa‘âdetlü efendi hazretlerine ifâde-i hâl eylediğimizde mesfûr Angeli fi’l-vâki‘ beratlı himâyede olup ve bunlar ber-mûceb-i şürût-ı cedîd ahidnâme esvâk ve pazarda bey‘ u şirâ ve mu‘âmelât-ı sâireden memnû‘lardır deyü mersûmun esnâfımızdan hurûcunu iltimâs etmeleriyle mesfûr Angeli ihtifâ etmekle fîmâ ba‘d esnâf-ı merkūmeden tard ve teb‘îd olunup san‘at-ı merkūmeye kat‘an müdâhale etmemek üzere cümlesi bi’l-ittifâk istid‘â ve istirhâm eyledikleri İstanbul Mahkemesi’nden huzûr-ı âlîlerine i‘lâm olundu. Fî-26 min C sene [1]217