İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 434 Hüküm no: 506 Orijinal metin no: [74a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karakazzâde Vakfı’ndan icareli menzili, beş sene Ana bt. İsayi ve bir sene de üvey oğlu Karabet v. Ferhad’ın tasarruf edeceği Pirinççi Mahallesi’nde kefere menzili muhâyâsı Ma‘rûz İstanbul’da Fatih Sultan Mehmed Han Câmi‘-i şerîfi kurbünde Pirinççi Sinan Mahallesinde vâki‘ merhûm Karakızzâde Vakfı musakkafâtından şehriye altmış akçe îcâre-i müecceleli ma‘lûmü’l-hudûd bir bâb vakıf menzilin altı sehm i‘tibâriyle beş sehm şâyi‘ine bâ-temessük-ı mütevellî mutasarrıfe olan şahsı mu‘arrefe Ana bt. İsayi Nasrâniye meclis-i şer‘-i münîrde üvey oğlu olup menzil-i merkūmun bir sehm-i şayi‘ine kezâlik bâ-temessük-ı mütevellî mutasarrıf olan Karabet v. Ferhad nâm zimmî muvâcehesinde vakf-ı mezbûr mütevellîsi el-Hâc İbrahim Efendi tarafından mürsel vekîli İmâm Hâfız Mustafa Efendi hâzır olduğu hâlde menzil-i merkūm benimle mesfûr Karabet zimmînin ber-vech-i meşrûh iştirâken taht-ı tasarrufumuzda olup lâkin kābil-i kısmet olmamağla beynimizde muhâyât olunmak murâdımdır deyü da‘vâ ve mersûm Karabet dahi ikrâr ve mütevellî vekîli hâzır-ı mezbûr dahi tasdîk ettikden sonra menzil-i mezkûru târih-i i‘lâm-ı şehri gurresinden beş sene tamamına değin mersûme Ana Nasrâniye zabt ve ba‘dehâ bir sene dahi mesfûr Karabet zimmî zabt ve tasarruf etmek üzere mütevellî vekîli mezbûr re’y ve tarefeyne vech-i meşrûh üzere tasarrufa izin vermeğin mûcebince menzil-i merkūmu ba‘de’t-tahliyye Nasrâniye-i mesfûreye teslîm olunmak iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî-selh-i Receb sene [1]217