İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 436 Hüküm no: 508 Orijinal metin no: [74b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sulukule bahçıvânlarından Hristo ve kardeşi Kiriço v. Panayot’un esnaflıktan çıkarıldığı Bahçıvân esnâfından ihrâcından men‘ ve ırzıyla mukayyed olmağa ta‘ahhüd Ma‘rûz Âsitâne-i aliyyede ve Boğaziçi’nde vâki‘ bahcivan tâifesinin kethüdâsı İsmail Ağa tarafından oğlu Ahmed Haseki ve yiğitbaşı Tanaş ve Yenibahçe’de vâki‘ Sulukule kolunda Dimo ve Topkapı yiğitbaşısı Celo ve Küçük Lanka yiğitbaşısı Onan ve Davudpaşa kolu yiğitbaşısı Dimitri ve Çukur kolu yiğitbaşısı Yorgaki ve tâife-i mersûmede Aleksi ve Yorgi ve Estefan ve Yano ve Pendezi ve Kosta ve Sedri ve Ziso ve Yano ve İlya vesâir cerîdede mazbûtü’l-esâmî zimmîler meclis-i şer‘-i münîrde sâlifü’z-zikr Sulukule bahçıvânlarından Hristo ve karındaşı Kiriço veledey Panayot nâm zimmîler muvâcehelerinde zimmîyân-ı mersûmân kendi hallerinde kâr u kesbleriyle meşgūller olmayıp dâimâ nizâm-ı kadîmimizin mugāyiri nice harekât-ı nâsezâya ictisâr ve tâifemiz beyninde türlü türlü fesâdı mûceb hâlât-ı nâ-bercâya ibtidâr ve şîrâze-i nizâmımızın ihtilâline bâdi oldukları âşikâr olmağla zimmîyân-ı mersûmân ma‘rifet-i şerle tedîb olunmak murâdımdır deyü mersûmânın sû-i hâllerinden bahisle iştikâ eylediklerinde onlar dahi inkârlarından mâ‘adâ fîmâ ba‘d mugāyir-i nizâm hareket etmeyip kendi kâr u kesbleriyle meşgūl ve ırzıyla mukayyed olmak üzere huzûr-ı şer‘de ta‘ahhüd ve eğer ba‘de’l-yevm hilâf-ı ta‘ahhüd bir hareketleri zuhûr eder ise vaz‘-ı kürek ile tedîb olunmak üzere mersûmân râzılar olup ve bu vechile mersûmânın nefislerine ve lede’l-mütâlebe huzûr-ı şer‘a ihzârına tâifelerinden Yorgaki v. Drako ve Dimitri v. Dimo v. Yano v. Dırako nâm üç nefer zimmîler dahi tekeffül etmeleriyle iştikâ eden tâife-i mersûmûn dahi zimmîyân-ı mersûmânın cünha-i sâbıkāları için iktizâ eden tedîblerinin icrâsını iltimâsdan fâriğler olup ve bu vechile kat‘-ı münâza‘a eyledikleri İstanbul Mahkemesi’nden huzûr-ı âlîlerine i‘lâm olundu. Fî-selh-i Receb sene [1]217