İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 440 Hüküm no: 513 Orijinal metin no: [75a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eskici esnafından Güloğlu Mustafa Beşe b. Mehmed’in, esnafa itâat edeceği ve nizama aykırı davranmayacağını taahhüt ettiği Eskici esnâfından hilâf-ı inhâ hareket etmemeğe ta‘ahhüd Ma‘rûz Âsitâne-i aliyyede vâki‘ eskici esnâfının kethüdâsı Mehmed Ağa ve yiğitbaşı Halil ve müsin ve ihtiyâr ustalarından Mehmed Ağa ve Ömer Alemdâr ve es-Seyyid Mehmed ve es-Seyyid Ali es-Seyyid Mahmud ve Hasan ve Hüseyin ve Fazlı Beşe ve Mustafa Beşe ve Gāib oğlu Mehmed Beşe ve Abdüsselam Beşe ve Tulumbacı Mehmed Beşe vesâir cerîdede mazbûtü’l-esâmî Müslimîn meclis-i şer‘-i münîrde yine esnâf-ı mezbûreden Güloğlu Mustafa Beşe b. Mehmed mahzarında merkūm Mustafa Beşe kendi halinde kâr u kesbiyle meşgūl olmayıp dâimâ nizâm-ı kadîmimizin mugāyiri nice harekât-ı nâ-sezâya ictisâr ve esnâfımızın beyninde türlü türlü fesâdı mûceb hâlât-ı nâ-bercâya ibtidâr ve şîrâze-i nizâmımızın ihtilâline bâdi olduğu âşikâr ve esnâf ma‘rifetiyle lonca odasına çağrıldıkda kat‘ân itâ‘at etmeyip ızhâr-ı huşûnet etmekle mezbûr Mustafa Beşe ma‘rifet-i şer‘le tedîb olunmak murâdımızdır deyü mezbûrun sû-i hâlinden bahisle iştikâ eylediklerinde ol dahi inkârından mâ‘adâ fîmâ ba‘d mugāyir-i nizâm hareket etmeyip kendi kâr u kesbiyle meşgūl ve ırzıyla mukayyed olmak üzere huzûr-ı şer‘de ta‘ahhüd ve eğer ba‘de’l-yevm hilâf-ı ta‘ahhüd bir hareketi zuhûr eder ise ma‘rifet-i şer‘le tedîb olunmak üzere mezbûr râzı olup ve bu vechile mezbûrun nefsine ve lede’l-mutâlebe huzûr-ı şer‘a ihzârına yine esnâf-ı mezbûreden Abdullah Alemdâr b. Ali ve Na‘lbandcıoğlu Mustafa Beşe ve Serdarzâde el-Hâc Halil nâm üç nefer kimesneler dahi tekeffül etmeleriyle iştikâ eden esnâf-ı mezbûrûn dahi mezbûr Mustafa Beşe’nin cünha-i sâbıkāsı için iktizâ eden tedîbinin icrâsını iltimâsdan fâriğler olup bu vechile kat‘-ı nizâ‘ eyledikleri İstanbul Mahkemesi’nden huzûr-ı âlîlerine i‘lâm olundu. Fî-5 Ş sene [1]217