İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 441 Hüküm no: 514 Orijinal metin no: [75a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanaki v. Yamandi’ye Mehmed Sâdık Ağa’nın kefil olduğu ve borcunu beş taksitte ödemesi 3.126,5 guruşdan 1.500 guruşa sulh ve te’cîl Ma‘rûz İstanbul’da Zindânkapısı hâricinde mütemekkin bakkāl tâifesinden sâhib-i arzuhâl Yanaki v. Yamandi zimmî meclis-i şer‘-i münîrde derûn-ı arzuhâlde ismi mezkûr dergâh-ı âlî kapıcıbaşılarından hâlâ sipâhîler ağası Şehsuvarzâde Saadetlü Hamdullah Beyefendi hazretleri taraflarından husûs-ı âtîde vekîl olduğu İnce Mehmed Ağa b. Hasan ve Seyfullah Efendi b. İsmail şehâdetleriyle sâbit olan Mehmed Sâdık Ağa b. İsmail muvâcehesinde müvekkil-i mûmâ-ileyh Hamdullah Beyefendi bin iki yüz dokuz senesi Cumâdelâhıresinin yirmi üçüncü gününden bin iki yüz on bir senesi Recebinin on yedinci gününe gelince malımdan ve yedimden ceste ceste iştirâ ve kabz eylediği bâ-defter-i müfredât vezn ve fiyatı ma‘lûm revgan-ı sâde ve revgan-ı zeyt semenlerinden gayrı ez teslîmât cem‘an üç bin yüz yirmi altı buçuk guruş el-yevm zimmetinde bâkī hakkım olmağla meblağ-ı bâkī-i merkūm müvekkil-i mûmâ-ileyhden hâlâ taleb ederim deyü da‘vâ eylediğimde ol dahi ber-vech-i muharrer müdde‘âmın bir mikdârını inkâr sadedinde iken vesâtet-i muslihîn ben tasaddî eylediğim da‘vâ-yı mezkûremden müvekkil-i mîr-i mûmâ-ileyhe izâfetle vekîl-i mezbûr bi-tav‘ ve’r-rızâ bin beş yüz guruşa ba‘de akdi’l-musâlahati ve’l-kabûl bedel-i sulh-ı mezkûrdan mâ‘adâ üç bin yüz yirmi altı buçuk guruşa varınca ziyâdesi olan bin altı yüz yirmi altı buçuk guruşa vesâir beynimizde cereyân eden cemî‘-i hukūk-ı şer‘iyyeye müte‘allika âmme-i de‘âvî ve kâffe-i mütâlebâtdan müvekkil-i mûmâ-ileyhin zimmetini kabûlünü hâvi ibrâ ve iskāt edip lâkin müvekkil-i mûmâ-ileyhe sâlifü’l-beyân ibrâdan müstesnâ bedel-i sulh-i merkūm bin beş yüz guruşunu hâlen ve def‘aten edâya kudreti olmayıp ber-vech-i âtî istimhâl etmekle ben dahi meblağ-ı merkūmun beş yüz guruşunu işbu târih-i i‘lâm senesi Ramazan-ı şerîfi gurresinde ve iki yüz elli guruşunu Zilka‘de gurresinde ve iki yüz elli guruşunu dahi sene-i âtiye Muharremi’l-hârâmı gurresinde ve iki yüz elli guruşunu dahi Rebî‘ülevvel gurresinde ve iki yüz elli guruşunu dahi Cemâziyelevveli gurresinde cem‘an beş taksît ile edâ ve îfâ etmek üzere rızâmla imhâl ve te’cîl ve meblağ-ı müeccel-i merkūma işbu vekîl-i merkūm Mehmed Sâdık Ağa kefâlet-i mutlaka-yı sahîha ile kefîl ve zâmin oldukda ben dahi kefâletini kabûl ve bu vechile kat‘-ı münâza‘a eyledik dediğini vekîl-i merkūm Mehmed Sâdık Ağa [75b] bi-tamâmihî tasdîk ve ber-minvâl-i muharrer kefâletini dahi ikrâr eylediği İstanbul mahkemesinde ba‘de’t-tescîl huzûr-ı âlîlerine i‘lâm olundu. Fî-25 min-Receb sene [1]217