İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 443 Hüküm no: 516 Orijinal metin no: [75b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Sıvacıoğlu Dimitraki v. Yavan’ın, Merhabâzâde Mahmud Efendi b. Mehmed Emin’e olan borcunu kabul ve ödeyeceğini taahhüt ettiği 1.265 guruşu Merhabâzâde Efendi sıvacı oğluna hüküm ve iki taksît te’cîl Ma‘rûz Kuzâtdan Merhabâzâde Mahmud Efendi b. Mehmed Emin meclis-i şer‘-i münîrde İstanbul’da ırgat pazarı nâm mahalde Bakkāl Sıvacıoğlu Dimitraki v. Yavan nâm zimmî muvâcehesinde mersûmun zevcesi mu‘arrefetü’ş-şahs Marya bt. Anaştaş Nasrâniye ile oğlu Yorgaki zimmî hâzırân oldukları hâlde bin iki yüz sekiz senesi Şevvâlinin on yedinci günü mersûm Dimitraki ile oğlu hâzır-ı mesfûr Yorgaki zimmîler ma‘an malımdan ve yedimden iktirâz ve kabz eyledikleri bâ-temessük beş yüz guruş ve yine bin iki yüz on senesi Saferinin dokuzuncu günü mesfûr Dimitraki zimmî müstakillen bâ-temessük malımdan ve yedimden iktirâz ve kabz eylediği bin guruş ki cem‘an zimmetlerinde bilâ-murâbaha hakkım olan bin beş yüz guruşun iki yüz otuz beş guruşunu mersûm Dimitraki ol mikdâr medyûnu olan Şeyhzâde Ahmed Said Efendi’den havâle edip ben dahi kabûl etmemle ol vechile bâkī kalan bin iki yüz altmış beş guruşu mesfûr Dimitraki ile oğlu hâzır-ı mersûmdan taleb ve da‘vâ eylediğimde onlar dahi ber-minvâl-i muharrer zimmetlerinde ol mikdâr guruş bilâ-murâbaha sahîhan deynleri olduğunu bi-tamâmihî tâyi‘an ve kat‘iyyen ikrâr u i‘tirâf edip lâkin hâlen ve def‘aten edâya kudretimiz yokdur deyü ber-vech-i âtî istimhâl etmeleriyle ben dahi mersûmân zimmetlerinde ber-minvâl-i meşrûh alacağım olan meblağ-ı bâkī-i mezbûr bin iki yüz altmış beş guruşun nısfını işbu târih-i i‘lâm senesinde duhûl edecek Mart ibtidâsında ve bâkīsini dahi sene-i âtiyede duhûl edecek rûz-ı Kasım hulûlünde iki taksît ile edâ ve îfâ etmek üzere medyûnlarım mesfûrânı rızâmla imhâl ve tehîr eyledikden sonra deyn-i meblağ-ı müeccel-i bâkī-i merkūm bin iki yüz altmış beş guruşa zevcesi hâzıra-ı mersûme Marya Nasrâniye ile oğlu hâzır-ı mesfûr Yorgaki zimmî tarefeynden bi’l-emr ve’l-kabûl kefâlet-i mutlaka-yı sahîha ile her biri müstakillen ve müte‘âkiben kefîl ve zâmin olduklarında ben dahi mersûmânın kefâletlerini kabûl eyledim deyü mezbûr Mahmud Efendi’nin sâdır olan bi’l-cümle takrîr-i meşrûhunu mesfûrûndan her biri tasdîk ve mablağ-ı bâkī-i mezbûr bin iki yüz altmış beş guruş bilâ-murâbaha zimmetlerinde sahîhan deynleri olduğunu ve hâzırân-ı mersûmân dahi ber-vech-i muharrer kefâletlerini kat‘iyyen ve tâyi‘an ikrâr u i‘tirâf ve ecel-i mezkûr hulûlünde vech-i meşrûh üzere edâ ve ifâya ta‘ahhüd eyledikleri İstanbul mahkemesi’nde ba‘de’t-tescîl huzûr-ı âlîlerine i‘lâm olundu. Fî-29 min-Receb sene [1]217