İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 444 Hüküm no: 517 Orijinal metin no: [76a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kandil gecesinde camilerin minarelerinde kandil yakılması İsbât-ı Receb ve Şa‘ban-ı şerîf İstanbul kādısı faziletlü efendi şerefyâfte-i sudûr olan hatt-ı hümâyûn-ı şevket-makrûn ve i‘lâmınız mûcebince leyle-i merkūmede îkād-ı kanâdil olunması husûsunu iktizâ edenlere tenbîh eyleyesiz deyü buyruldu. Fî-14 Şa‘ban sene [1]217 Dergâh-ı cihanmutâ‘ ve bârgâh-ı sipehr-i irtifâ‘a ma‘rûz-ı abd-i dâ‘î-i adîmü’l-istitâ‘alarıdır ki İstanbul’da Sarrachâne kurbünde Mi‘mar Abbas Mahallesi ahâlîsinden Merhabâzâde Mahmud Efendi meclis-i şer‘-i münîrde Ahmed Ağa b. Ali mahzarında mezbûr Ahmed Ağa zimmetinde semeni işbu bin iki yüz on yedi senesi Şa‘bâni’l-mu‘azzamının on ikinci günü hulûlüne değin müeccel-i mev‘ûd olmak üzere malımdan ve yedimden iştirâ ve kabz eylediği Dürrü’l-muhtâr semeninden yirmi beş guruş alacak hakkım olup ve şehr-i mezbûr gurresi yevm-i Cumadan olmağla târih-i i‘lâm olan işbu selesâ günü şehr-i mezbûrun on ikinci günü olup ve deyn-i mezkûrun vakti hulûl etmekle meblağ-ı merkūmu mezbûr Ahmed Ağa’dan hâlâ taleb ederim deyü da‘vâ ol dahi semen-i meblağ-ı mezkûrdan ol mikdâr guruş yevm-i mezbûr hulûlüne değin müeccel zimmetinde deyni olduğunu ikrâr lâkin gurre-i Şa‘bâni’l-mu‘azzam yevm-i Cumadan olup târih-i i‘lâm günü olan işbu yevm-i sâlis şehr-i mezbûrun on ikinci günü olduğu ve deyn-i mezkûrun vakti hulûl eylediği ma‘lûmum değildir deyü inkâr etmekle müdde‘î-i mezbûr ber-vech-i meşrûh müdde‘âsını isbât için meclis-i şer‘a ikāmet eylediği udûl-i Müslimînden sâbıkā İzmir kādısı efendinin es‘âr nâibi olup bu esnâda Âsitâne-i aliyyeye gelen Musa Efendi b. Mehmed ile İstanbul’da Fatih Sultan Mehmed Han Câmi‘-i şerîfi civârında sâkin es-Seyyid Mehmed Ziyaeddin Efendi b. eş-Şeyh Abdullah Salahaddin ve medîne-i Hazret-i Ebâ Eyyüb el-Ensârî’de Rami çiftliği civârında sâkin kuzâtdan es-Seyyid Mehmed Tahir Efendi b. es-Seyyid Mustafa nâm kimesneler istişhâd olunduklarında işbu sene-i mübâreke Cumâdelâhıresinin yirmi dokuzuncu selâse günü ba‘de’l-gurûb Çarşamba gecesi matla‘-ı ehille olan ufk-ı garbîde kıble cânibine müteveccih ve semâda gaym olduğu hâlde zikr olunan İzmir’de ve Âsitâne-i aliyyede mürtefi‘ mahallerde hilâl-i Recebi’l-ferdi re’yü’l-ayn müşâhede eyledik ol vechile sene-i mezbûre Recebi’l-ferdi gurresi Çarşamba gününden olup tekmîl-i selâsin ile gurre-i Şa‘bâni’l-mu‘azzam yevm-i Cumadan ve târih-i i‘lâm olan işbu yevm-i selâse Şa‘ban-ı şerîfin on ikinci günüdür biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye ettiklerinde gıbbe’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükmol vechile leyle-i Berât-ı bereket-gāyet-i şehr-i şerîf-i mezbûrun on beşinci işbu Cuma gecesi olmağla âdet-i hasene-i devlet-i aliyye ve deydene-i müstahsene-i saltanat-ı seniyye üzere minârât-ı cevâmi‘-i cami‘atü’l-berekât îkād-ı kanâdil ile tenvîr ve ol leyle-i mübâreke bu vechile tebcîl ve tevkīr olunmağla bi’l-cümle kulûb-i müminîn safa-rehin ve neşât-karîn olmaları için selâtîn-i âlişân —nevvarallâhu merâkidehum bi-envâ‘ri’l-Gufrân ve’l-ihsân— hazerâtı cevâmi‘-i şerîfeleri kayyımlarına bâ-fermân-ı âlî tenbîh olunmak iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî-12 min-Şa‘ban sene [1]217