İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 448 Hüküm no: 521 Orijinal metin no: [76b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikotimus v. Serkiz’in tütüncü gediği davasında Yorgi, Estavri ve Yani ile sulh oldukları Lanka-i Kebîr’de tütüncü gediği nizâ‘ı 100 guruşa sulh Ma‘rûz Mübârek rikāb-ı kamer-tâb-ı hüsrevânî arzuhâl takdîm eden Nikotimus v. Serkiz zimmî meclis-i şer‘-i münîrde derûn-ı arzuhâlde isimleri mezkûr kendiden asîl ve Yorgi v. Dimitri ve Estavri v. Togodoş zimmîler taraflarından vekîlleri olmak üzere hâzır olan bakkāl Yani v. Rabka zimmî muvâcehesinde mersûmûn Yorgi ve Estavri ve Yani zimmîler İstanbul’da Lanka-i Kebîr kurbünde Mirahor Mahallesi’nde vâki‘ bakkāl dükkânı ile hamam dolabı beyninde kâin bir bâb tütüncü dükkânında mevcûde gedik tâ‘bir olunan âlât-ı lâzımeyi ma‘den kaleminde mukayyed mu‘teber tütüncü gediğine bi’l-iştirâk mülkleri olmak üzere iki yüz yirmi beş guruş semen-i makbûza bana bâ-hüccet-i şer‘iyye bey‘ edip lâkin gedik-i mezkûrun kalemde kaydı olmadığı hâmiş-i arzuhâlde mastûr derkenârdan müstebân olmağla dükkân-ı merkūm derûnunda olan âlât-ı lâzıme-i mezkûreyi yedimden geri ahz-birle makbûzları olan meblağ-ı merkūm iki yüz yirmi beş guruşu istirdâd ederim deyü tasaddî eylediğim da‘vâmdan bâ-vesâtet bi’t-tav‘ ve’r-rızâ zimmîyyûn-ı mersûmûn ile yüz guruş bedel-i makbûza ba‘de akdi’l-musâlahati ve’l-kabûl mâ‘adâya ve bi’l-cümle husûs-ı mezkûra müte‘allika âmme-i de‘âvîden mersûmûnun zimmetlerini kabûllerini hâvi ibrâ ve iskāt etmemle âlât-ı mezkûre yine kemâ-fi’s-sâbık mersûmûnun bi’l-iştirâk malları olup benim kat‘an alâkam kalmamışdır dediğini mersûm Yani zimmî bi’l-asâle ve bi’l-vekâle tasdîk eylediği İstanbul Mahkemesi’nden tescîl ve huzûr-ı âlîlerine i‘lâm olundu. Fî-12 Ş sene [1]217