İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 448 Hüküm no: 522 Orijinal metin no: [76b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çuban v. Mardros’un, Seyyid Mehmed Ağa b. Ömer’e olan borcunu taksitle ödeyeceği 5.000 guruşu beher sene tamamında 1.000 guruşa te’cîl Ma‘rûz İşbu târihde keresteci esnâfının nizâmına da‘ir bir i‘lâm sehven hüccet siciline kaydolunmuşdur iktizâ olundukda hüccet sicili dahi tetebbu‘ oluna gaflet olunmaya Fî-25 Receb sene [1]217 Ma‘rûz Sarraf tâifesinden arzuhâl eden Çoban v. Mardros zimmî meclis-i şer‘-i münîrde dergâh-ı âlî çavuş gediklülerinden derûn-ı arzuhâlde ismi mezkûr es-Seyyid Mehmed Ağa b. es-Seyyid Ömer mahzarında mersûm Çoban zimmînın oğlu gāib ani’l-meclis Manil zimmî zimmetinde cihet-i karzdan sekiz bin guruş hakkım olup medyûnum mersûm bundan akdem bin iki yüz on dört senesi Rebî‘ülevveli gurresinde deyn-i mezkûruyla beni babası işbu mersûm Çoban zimmî üzerine üçümüz bir meclisde iken havâle-i sahîha-i mutlaka-yı şer‘iyye ile havâle ve her birimiz havâle-i mezkûreyi kabûl edip ol vechile cihet-i havâle-i mezkûreden alacağım olan meblağ-ı mezbûrun iki bin guruşunu bundan akdem mersûm Çoban zimmî yedinden kabz ve mâ‘adâ altı bin guruşu zimmetinde olmağla taleb ederim deyü da‘vâ eylediğimde ol dahi ber-vech-i muharrer müdde‘âmı bi-tamâmihî ikrâr u i‘tirâf edip lâkin deyni olan meblağ-ı mezbûrun bin guruşunu el-hâletü hâzihi bana teslîm ben dahi kabz edip bâkī kalan beş bin guruşu hâlen ve def‘aten bir vechile edâya kudreti olmadığı hâmiş-i arzuhâle derkenâr olunan fermân-ı âlîşândan müstebân olup ber-vech-i âtî istimhâl etmekle ben dahi târih-i i‘lâmdan beher sene biner guruş verip deyn-i mezkûrunu beş sene tamamına değin müeccelen ve muksitan edâ ve îfā etmek üzere rızâmla medyûnum muhtâlün aleyh-i mesfûru imhâl ve te’cîl eylediğimde ol dahi ber-vech-i muharrer [77a] edâya ta‘ahhüd ve bu vechile kat‘-ı nizâ‘ eyledik dediğini mersûm Çoban zimmî bi-tamâmihî tasdîk eylediği İstanbul mahkemesinde tescîl ve huzûr-ı âlîlerine i‘lâm olundu. Fî-14 min Ş sene [1]217 Şuhûdü’l-hâl: Kılavuz yamağı es-Seyyid Mehmed Tahir Ağa, es-Seyyid el-Hâc Ahmed Ağa, Sadr-ı âlî kalemi çukadârlarından Hasan Ağa, Şişman Halil Ağa b. Mustafa