İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 449 Hüküm no: 523 Orijinal metin no: [77a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Zeliha bt. Osman’ın, vakıf menzil davasında Haraccı Hamza Bali vakfının mütevellîsi ile sulh oldukları Vakıf menzil nizâ‘ı Ma‘rûz İstanbul’da Fatih Sultan Mehmed Hân Câmi‘-i şerîfi kurbünde Pirinççi Sinan Mahallesi’nde sâkine mu‘arrefetü’z-zât Şerîfe Zeliha bt. Osman nâm hatun meclis-i şer‘-i münîrde nezâret-i dâ‘îlerinde âsûde evkāfdan merhûm Haraccı Hamza Bali Vakfı mütevellîsi İbrahim b. el-Hâc Mustafa mahzarında İstanbul’da Şeyh Muhyiddin Kocavî Mahallesi’nde vâki‘ bir tarafdan Ahmed Molla Efendi menzili ve bir tarafdan Turacı Süleyman menzili ve bir tarafdan Tuzcu Ahmed menzili ve bir tarafdan tarîk-i âm ile mahdûd ve müştemilât-ı ma‘lûmeyi hâvi bir bâb menzilin arsası vakf-ı mezbûra senevî doksan akçe mukāta‘a-i kadîmeli ve üzerinde olan bi’l-cümle ebniyesi mülk menzil kız karındaşım Şerîfe Âişe bt. el-mezbûr Osman nâm Hatunun bâ-hüccet şirâen yedinde mülkü iken sene-i sâbıkā Cumâdelâhıresinin yirmi üçüncü günü kız karındaşım mezbûre Şerîfe Âişe Hatun menzil-i mahdûd-ı mezkûru bâ-hüccet semen-i ma‘lûm ve makbûza bana bey‘-i kat‘î ile bey‘ ve temlîk ve teslîm ben dahi iştirâ ve temellük ve tesellüm ve kabûl edip ol vechile menzil-i merkūm müstakilleten yedinde mülk-i müşterâsı olmuşken kız karındaşım Şerîfe Âişe Hatun bu esnâda fevt olmağla mütevellî-i mezbûr menzil-i merkūmun arsa ve ebniyesi vakıf olmak zu‘muyla menzil-i merkūmu müteveffiye-i mezbûrenin bilâ-veled fevtinden vakıf için zabt murâd eder deyü da‘vâ ve mütevellî-i merkūm dahi menzil-i mezkûrun arsa ve ebniyesi vakıf olmağla müteveffât-ı merkūmenin bilâ-veled mahlûlünden cânib-i vakfa aid olmuşdur deyip lâkin kadîmden beri menzil-i merkūmun ebniyesi tedâvül-i eyâdî ile müstenid-i şer‘îye binâen mülkiyet üzere zabt ve tasarruf olunagelip ol vechile mütevellî-i merkūmun vakfiyet da‘vâsının sübûtu müte‘assir belki müte‘azzir olmağla mezbûre Şerîfe Zeliha Hatun nef‘an li’l-vakf mütevellî-i mezbûra yetmiş guruş def‘ ve teslîm ol dahi bi’t-tevliye ahz u kabz ve menzil-i merkūm ittisâlinde yine vakf-ı mezbûrdan müteveffiye-i mezbûrenin bi’l-îcâreteyn tasarrufunda olup bilâ-veled fevtinden münhal olan terbî‘an elli dokuz zirâ‘ arsayı mezbûre Şerîfe Zeliha Hatuna îcâr ve teslîm ve menzil-i mahdûd-ı mezkûru ke’l-evvel kadîmi üzere arsası senevî mukāta‘a-i mezkûre ile ve bi’l-cümle ebniyesi mülk olmak üzere merkūme Şerîfe Zeliha Hatun yedinde olan atîk temessükât hâmişlerine tahrîr ve temhîr-birle kat‘-ı nizâ‘ eyledikleri İstanbul Mahkemesi’nden huzûr-ı âlîlerine i‘lâm olundu. Fî-7 min Ş sene [1]217