İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 450 Hüküm no: 524 Orijinal metin no: [77a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sahak v. Tavit’in, Yako v. Mosi’deki alacağı hususunda, bedel-i sulh karşılığında anlaştığı Bâ-temessük 1.920 guruşu 800 guruşa sulh ve edâya tenbîh Ma‘rûz Sâhib-i arzuhâl sarraf tâifesinden Pabuççu Sahak v. Davit nâm zimmî Çarşamba günü dîvân-ı âlide huzûr-ı âsafânelerinde ba‘dehû İstanbul mahkemesinde meclis-i şer‘-i münîrde derûn-ı arzuhâlde merkūmü’l-ism Yako v. Mosi nâm Yahûdi muvâcehesinde mesfûr Yako Yahûdi zimmetinde Yahûdi lisânı üzere muharrer yedime verdiği bir kıt‘a deyn temessükü mantûkunca cihet-i karzdan bin dokuz yüz yirmi guruş alacak hakkım olmağla meblağ-ı mezbûru Yahûdi-i mesfûrdan hâlâ taleb ederim deyü tasaddî eylediğim da‘vâmdan bâ-vesâtet-ı muslihîn bi’t-tav‘ ve’r-rızâ Yahûdi-i mersûm ile sekiz yüz guruşa ba‘de akdi’l-musâlahati ve’l-kabûl bedel-i sulh-i mezkûrdan mâ‘adâ bin dokuz yüz guruşa varınca ziyâdesi olan bin yüz yirmi guruşa ve târih-i i‘lâma gelince vesâir beynimizde cereyân eden cemî‘ ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika mutlakan âmme-i de‘âvî ve kâffe-i mütâlebâtdan Yahûdi-i mesfûrun zimmetini kabûlü havi ibrâ-i âmm-ı sahîh-i şer‘î ile ibrâ ve iskāt eyledim deyü mukırr-ı zimmî-i mesfûrun bi’l-cümle takrîr-i meşrûhunu mersûm Yako Yahûdi tasdîk ve sâlifü’l-beyân ibrâdan istisnâ olunan bedel-i sulh-i mezbûr sekiz yüz guruş zimmetinde sahîhan müdde‘î-i zimmî-i mersûma deyni olduğunu kat‘iyyen ve tâyi‘an ikrâr u i‘tirâf etmeğin alâ-mûceb-i i‘tirâfihî meblağ-ı mezbûr sekiz yüz guruşun müdde‘î-i mesfûr Sahak zimmîye bi’t-taleb edâsıyla Yahûdi-i mersûm ilzâm olunduğu huzûr-ı âlîlerine i‘lâm olundu. Fî-18 Ş sene [1]217