İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 451 Hüküm no: 525 Orijinal metin no: [77a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ramazan ayı yaklaştığından, çörekçi esnafının pişirdikleri çöreklere azami itina göstermeleri gerektiği Ma‘rûz Sâdır olan fermân-ı âlîlerine imtisâlen çörekçi esnâfının bir müddetden beri i‘mâl eyledikleri çöreklerinin kerestesine ve yağına ihtimâm etmediklerinden ekle gayr-ı sâlih derecelerine resîde ve el-hâletü hâzihi Ramazan-ı Gufrân-nişan takarrüb edip ibâd-ı müminîne has ve a‘lâ çörek ve füruhtu için nizâm ve ihtimâm vâcibeden olduğundan esnâf-ı mezkûre kethüdâsı vesâirleri meclis-i şer‘a ihzâr ve mazmûn-ı emr-i âlî gereği gibi etrâfıyla tefhîm olundukda cümlesi sem‘an ve tâ‘aten merâsimini edâ ile ba‘de’l-yevm fırınlarda tabh ve i‘mâl edecekleri çörekleri hâssu’l-hâs dakīk ile a‘lâ revgan-ı sâde izâfesiyle tabh ve ibâdullâha bu vechile bey‘ etmek üzere ta‘ahhüd ve eğer bundan sonra hilâf-ı hareket-birle izâfe eyledikleri revgan-ı çerviş olmak lâzım gelir ise mazmûn-ı emr-i âlî üzere bilâ-imhâl tedîbât-ı şedîdeleri icrâsında dakīka fevt olunmayacağını gereği gibi gûş-ı hûşlarına ilkā ve tefhîm olunduğu İstanbul Mahkemesi’nden huzûr-ı âlîlerine i‘lâm olundu. Fî-22 min Ş sene [1]217