İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 451 Hüküm no: 526 Orijinal metin no: [77a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa b. Salih ve zevcesi Nefise bt. İsmail’in, Karaki Hüseyin Çelebi vakfından icareli vakıf menzilini Ümmügülsüm bt. Yahya’ya iade etmeleri gerektiği Ma‘rûz İstanbul’da Hocapaşa kurbünde Karaki Hüseyin Çelebi Mahallesi’nde sâkine mu‘arrefetü’z-zât Ümmügülsüm bt. Yahya nâm Hatun meclis-i şer‘-i münîrde Ali Ağa b. Salih ve zevcesi zâtı mu‘arrefe Nefise bt. İsmail nâm Hatun muvâcehelerinde mârru’z--zikr Karaki Hüseyin Çelebi Vakfı mütevellîsi Ahmed Ağa b. Ali hâzır olduğu hâlde bin iki yüz on beş senesi Rebî‘ülevvel gurresinde mezbûr Ali Ağa malımdan ve yedimden iktirâz ve kabz eylediği yüz elli guruşa zevcesi mezbûre Nefise Hatun tarefeynden bi’l-emr ve’l-kabûl kefîl ve zâmine olup zevcân-ı mezbûrân vakf-ı mezbûr musakkafâtından [77b] bi’l-îcâreteyn mutasarrıf oldukları Paşakapısı verâsında kâin ma‘lûmü’l-hudûd beher şehr yirmi akçe îcâre-i müecceleli bir bâb vakıf menzillerini her ne zamân deyn-i mezkûru edâ ederler ise redd-i ferağ etmek üzere bâ-re’y-i mütevellî vefâen bana ferağ ve kasr-ı yed etmişler idi hâlâ meblağ-ı merkūm yüz elli guruşu bana edâ-birle menzil-i mezkûr bâ-ma‘rifet-i mütevellî redd-i ferağ olunmak üzere zevcân-ı mezbûrâna tenbîh olunmak murâdımdır deyü da‘vâ ettiğimde onlar dahi ber-vech-i muharrer müdde‘âmı bi-tamâmihî kat‘iyyen ve tâyi‘an ikrâr u i‘tirâf ve deyn-i meblağ-ı merkūm yüz elli guruşu işbu târih-i i‘lâm senesi Zilka‘deti’ş-şerîfe gurresinde bana edâ-birle menzil-i mezkûru redd-i ferağ olunmak üzere her biri ta‘ahhüd etmeleriyle ben dahi bu vechile râzıye olup mezbûrânı imhâl eyledim deyü ikrâr ve tasdîkleri İstanbul mahkemesinde tescîl ve huzûr-ı âlîlerine i‘lâm olundu. Fî-21 Ş sene [1]217