İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 452 Hüküm no: 527 Orijinal metin no: [77b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mahmud’un, Sultan Abdülhamid Han vakfından icareli, vesayeti gereği yarım hissesine malik olduğu kasap dükkânı gediğini Hasan Beşe’ye devrettiği Kasab Ma‘rûz Hüdâvendigâr-ı sâbık cennet-mekân firdevs-âşiyân merhûm ve mağfûrun leh Sultan Abdülhamid Hân —tâbe serâhu— hazretlerinin evkāf-ı şerîfeleri musakkafâtından olup İstanbul’da Yedikule hâricinde kâin birinci selhhâneye merbût Galata’ya muzâfe kasaba-i Kasımpaşa’da Ada nâm mahalde câmi‘-i kebîr kurbünde vâki‘ ganem selhhânelerinden bir bâb kasab dükkânı derûnunda mevcûde beyne’l-esnâf gedik tâ‘bir olunan âlât-ı lâzıme-i ma‘lûmenin nısf-ı şâyi‘ine bâ-temessük-ı mütevellî mutasarrıfe olan sagīre Hatice bt. Kasab İbrahim’in vâlidesi ve tesviye-i umûruna bâ-hüccet vasîsi mu‘arrefetü’z-zât Âişe bt. Mahmud nâm hatun meclis-i şer‘-i münîrde hâlâ kasabbaşı ser-bevvâbîn-i dergâh-ı âlî İzzetlü Mustafa Ağa tarafından mürsel kasablar kethüdâsı el-Hâc Halil ve ustalarından Hâfız el-Hâc Mehmed Emin vesâirleri hâzır oldukları hâlde âlât-ı lâzıme-i mezkûrenin nısf-ı şâyi‘-ı âharına mutasarrıf olan bâ‘isü’l-i‘lâm Kasab Hasan b. Ali mahzarında bi’l-vesâye takrîr-i kelâm edip sagīre-i mezbûrenin ber-vech-i muharrer mutasarrıfe olduğu nısf-ı âlât-ı lâzıme-i merkūmeyi bâ-mesûğ-ı şer‘î bedel-i misli idüğü ihbâr olunan bin yüz yirmi beş guruş bedel-i makbûz mukābelesinde müşteriki mezbûr Kasab Hasan’a bâ-re’y-i mütevellî bi’l-vesâye ferağ ve kasr-ı yed eylediğimde ol dahi tefevvüz ve kabûl etmekle fîmâ ba‘d nısf-ı âlât-ı lâzıme-i mezkûrede kızım sagīre-i mezbûrenin kat‘an alâka ve medhali kalmayıp mezbûr Hasan Beşe’nin dâhil-i havza-i tasarrufu olmuşdur dedikde ol dahi tasdîk etmekle nısf-ı âlât-ı merkūme sagīre-i mezbûrenin üzerinden müşteri-yi merkūm Hasan üzerine defter-i vakfa ba‘de’l-kayd ve yedine temessük i‘tâ buyrulmasını istid‘â eylediği İstanbul Mahkemesi’nden huzûr-ı âlîlerine i‘lâm olundu. Fî-22 min Ş sene [1]217