İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 453 Hüküm no: 528 Orijinal metin no: [77b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Hüseyin’in, zevc-i mutallakı Bıçakçı Mustafa Beşe b. Hüseyin’den boşandığı Şart ta‘likini isbât Ma‘rûz Mübârek rikāb-ı kamer-tâb-ı hüsrevâneye takdîm-i arzuhâl eden Hatice Hatun’un sâkine olduğu mahrûse-i Galata’ya muzâfe kasaba-i Tophane’de İlyas Çelebi Mahallesi İmâmı eş-Şeyh Mehmed Efendi b. Mustafa ve ahâlîsinden Kalafatzâde İsmail Ağa b. İbrahim ve eş-Şeyh Abdülfettâh Efendi b. el-Hâc Mustafa nâm kimesneler meclis-i şer‘-i münîrde mu‘arrefetü’z-zât mezbûre Hatice bt. Hüseyin nâm Hatun muvâcehesinde mezbûre Hatice’nin zevc-i mutallakı Bıçakçı Mustafa Beşe b. Hüseyin hâzır olduğu hâlde hâzır-ı mezbûr Mustafa zevcesi merkūmeye hitâb edip eğer ben seninle fîmâ ba‘d kavga eder isem ve sen dahi benim kasaba-i mezbûrede kâin bıçakçı dükkânına gelir isen benden boş ol deyü şart ve ta‘lîk ve şart-ı merkūmun vukū‘unda benden beynûnet-i muğallaza? ile bâyîn ve bilâ-tahlîl bana haram olursun deyü ikrâr ve bizleri işhâd edip hâzır-ı mezbûr Mustafa Beşe zevcesi mezbûre ile kavga ve nizâ‘ ve zevcesi mezbûre dahi zevci hâzır-ı merkūmun dükkânına varıp ol vechile mu‘allakun aleyh olan fi‘ilin vukū‘una binâen zevce-i mezbûre zevci hâzır-ı merkūmdan beynûnet-i muğallaza ile bâyîne olmağla zevce-i merkūme husûs-ı mezbûru târih-i i‘lâm senesi Recebi’l-ferdinin on beşinci günü kasaba-i Tophane mahkemesinde nâibü’ş-şer‘i’l-kavîm olan Uryânizâde Mehmed Vahid Efendi huzûrunda da‘vâ ve zevci hâzır-ı merkūm dahi müdde‘âsını bi-tamâmihî ikrâr u i‘tirâf edip zimmetinde mütekarrir yirmi beş guruş mehr-i müeccelini edâ ile iddeti inkızâsına değin infâka tenbîh-i şer‘î dahi olmuşken bu esnâda hâzır-ı merkūm mutallaka-yı mezbûreye kable’t-tahlîl tekrar ezvâc mu‘amelesi kasdıyla menziline duhûl murâd etmekle men‘ olunmak murâdımdır dediklerinde mezbûrân dahi husûs-ı merkūmu külliyen inkâr eylediklerinde husûs-ı mezbûre şehâdet-i hasene kabîlinden târih-i mezbûr ile muvarrah nâib-i mûmâ-ileyhin hatmini hâvi ibrâz olunan bir kıt‘a i‘lâmın mazmûnu lede’t-tezkiye adl ve makbuli’ş-şehâde idükleri ihbâr olunan mezbûrûn İmâm eş-Şeyh Mehmed Efendi ve Kalafatzâde İsmail Ağa ve Abdülfettâh Efendi şehâdetleriyle bi’l-muvâcehe vech-i şer‘î üzere sâbit olmağın mûcebince mezbûr Mustafa Beşe’ye ba‘de’t-tenbîh mahalle-i mezbûre ahâlîsinden Müezzin Ahmed Efendi ve Camcı İsmail Beşe ve Bağdâdîzâde el-Hâc Mehmed Emin Ağa ve Ahmed Çavuş ve Mehmed Efendi ve Molla İsmail ve Koltukçu es-Seyyid Mehmed Ağa ve Mehmed Beşe ve Ahmed Ağa ve Kara Ali Ağa vesâirleri yine meclis-i şer‘de merkūm Mustafa Beşe mahzarında eğer ba‘de’t-tahlîl yine zevcesi mezbûreyi tezevvüc eder ise mâlik olduğu zenciye câriyesini âhara bey‘ edip ve fîmâ ba‘d câriye iştirâ etmemek üzere müte‘ahhid olur ise mahallemizde sâkin olsun ve illâ mahallemizden hurûcunu iltimâs ederiz dediklerinde mezbûr Mustafa Beşe dahi ba‘de’l-yevm mahalle-i mezbûrede ikāmet mukadder olur ise ahâlî-i mahalle-i mezkûrenin rızâları üzere hareket ederim deyü ta‘ahhüd eylediği İstanbul Mahkemesi’nden huzûr-ı âlîlerine i‘lâm olundu. Fî-21 min Ş sene [1]217