İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 456 Hüküm no: 533 Orijinal metin no: [78b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ramazan ayı geldiğinden, cami ve mescitlerde kandil yakılması İkād-ı kanâdil İstanbul kādısı faziletlü efendi şeref-yâfte-i sudûr olan hatt-ı hümâyûn-ı şevket-makrûn-ı mülûkâne mûcebince leyle-i merkūmede îkād-ı kanâdil olunmasını iktizâ edenlere tenbîh eyleyesin deyü buyruldu. Fî-28 min Ş sene [1]217 Ma‘rûz Dergâh-ı felek-bünyân ve bârgâh-ı asumân unvânlarına ma‘rûz-ı dâ‘î-i şâkirü’l-ihsânlarıdır ki târih-i hicret-i Nebeviyye —aleyhi ve alâ-âlihi efdâlü’t-tahiyyenin— işbu bin iki yüz on yedinci senesi şehr-i Recebi’l-ferdi gurresi yevm-i erbe‘âdan olduğu ber-nehc-i şer‘î sâbite olup lâkin hilâl-i Şa‘bâni’l-mu‘azzam henüz rü’yet ile sâbit olmamağla tekmîl-i selâsin ile Şa‘bâni’l-mu‘azzamı gurresi yevm-i Cumadan mazbût olup ol vechile şehr-i Şa‘bâni’l-mu‘azzam dahi selâsin ile itmâm ve işbu ahad günü gurre-i şehr-i Ramazani’l-mübârek olup şer‘an sıyâme şürû‘ ve ikdâm emr-i vâcibü’l-ihtimâm olmağla kudûm-ı meymenet-lüzûm-ı mah-ı mübâreği tebşîr ve i‘lân ve sürûr-endâz-ı kulûb-ı ehl-i imân olmak için leyle-i şerîfe-i mezbûrede ber-mûceb-i dâbb-ı dîrîn-i kāmet-zîbâ-yı minârât-ı cevâmi‘-i câmi‘atü’l-berekât ilbâs-ı kubbâ-yı zerrîn-i nâr-ı kanâdil ile tezyîn olunmak bâbında ısdâr-ı fermân-ı cihan-mutâ‘ menût-ı irâde-i aliye-i vâcibetü’l-ittibâ‘ idüğü İstanbul Mahkemesi’nden Asitân-ı âsumân-tüvânlarına i‘lâm olundu bâkī emr u fermân li-hazret-i veliyyü’n-ni‘meti ve’l-ihsân. Fî-28 min Ş sene [1]217