İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 457 Hüküm no: 534 Orijinal metin no: [78b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lütfullah b. Abdülaziz’in, Dimitraki’deki kahve semeni alacağına babası Espir’in kefil olduğu Ma‘rûz Derûn-ı arzuhâlde ismi mezkûr tüccârdan el-Hâc Lütfullah b. Abdülazîz nâm kimesne meclis-i şer‘-i münîrde dellâl tâifesinden arzuhâl eden Mosi v. Benato nâm Yahûdi muvâcehesinde ben bundan akdem Yahûdi-i mersûmun dellâliyetle malımdan bin yüz yetmiş yedi buçuk vakıyye kahvemi beher vakıyyesi üçer buçuk guruşdan cem‘an dört bin yüz yirmi bir guruş beş para semen tesmiyesiyle işbu hâzır bi’l-meclis tüccârdan Espiro zimmînin oğlu olup bu esnâda diyâr-ı âhara firâr eden Dimitraki nâm zimmîye bey‘ ve teslîm ol dahi iştirâ ve kabz edip semen-i merkūmu beher şehr biner guruş vermek üzere rızâmla te’cîl ve imhâl eylediğimden sonra semen-i meblağ-ı mezbûr dört bin yüz yirmi bir guruş beş paraya müşteri-i mesfûrun babası hâzır-ı mersûm Espir zimmî kefâlet-i mutlaka-yı sahîha ile kefîl ve zâmin olmağla ol vechile meblağ-ı merkūm asâleten ve kefâleten zimmîyân-ı mersûmân zimmetlerinde olup husûs-ı mezkûrda Yahûdi-i mesfûr ancak dellâl ve mu‘abber ve sefir-i mahz olmağla meblağ-ı mezbûrdan mersûm Mosi Yahûdi zimmetinde bir akçe ve bir habbe hakkım ve alacağım yokdur deyü ikrâr ve tasdîkleri İstanbul mahkemesinde tescîl ve huzûr-ı âlîlerine i‘lâm olundu. Fî-21 min-Receb sene [1]217