İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 458 Hüküm no: 535 Orijinal metin no: [78b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Yorgi v. Dimitri v. Yavan’ın vârisleri’nin şerbethane gediği davasında Kostandi v. Tanaş ile sulh oldukları Galata şerbethâne gediği da‘vâsından 150 guruşa sulh Ma‘rûz İstanbul’da Vezirhanında mütemekkin iken bundan akdem hâlik olan Sarraf Yorgi v. Dimitri v. Yuvan nâm zimmînin verâseti zevce-i metrûkesi Sofya bt. Vasil Nasrâniye ile sulbî kebîr evlâdı sâhibe-yi arzuhâl Nikola zimmî ve Maryam Nasrâniye inhisârı tahakkukundan sonra kendiden asıl ve anası zevce-i mersûme Sofya Nasrâniye tarafından husûs-ı âti’l-beyânda vekîl olduğu şahsını damadı Yorgi v. Nikola ve Anaştaş v. İskerlet zimmîler şehâdetleriyle sâbit olan mersûm Nikola ile mersûme Maryam Nasrâniye’nin zevci ve tarafından kezâlik husûs-ı âti’l-beyânda vekîl olduğu şahsını ârifân mersûmân Nikola ve Anaştaş zimmîler şehâdetleriyle ber-nehc-i şer‘î sâbit olan Yorgi v. Nikola zimmîlerden her biri bi’t-terâzi meclis-i şer‘-i münîrde mahrûse-i Galata hâricinde Beyoğlu nâm mahalde simitçi fırını kurbünde çifte mahzen tâ‘bir olunur iki bâb koltuk şerbethâne derûnunda mevcûde gedik tâ‘bir olunan âlât-ı lâzımeye vaz‘-ı yedi mütehakkık olan derûn-ı arzuhâlde mersûmu’l-ism Kostandi v. Tanaş zimmî muvâcehesinde zikr olunan gedik tâ‘bir olunur âlât-ı lâzıme-i ma‘lûmenin nısf-ı şâyi‘leri mûrisimiz babam mersûm Yorgi zimmînin ile’l-helâk yedinde mülkü olup ba‘de helâkihî bize mevrûs olmuşken mersûm Kostandi zimmî fuzûlî zabt etmekle nısf-ı âlât-ı lâzıme-i mezkûreden keff-i yedi murâdımızdır deyü bi’l-asâle ve bi’l-vekâle taleb ve da‘vâya tasaddî eylediğimizde ol dahi cevâbında benim mûrisiniz hâlik-i mersûm zimmetinde cihet-i karzdan üç bin iki yüz guruş hakkım olup şuhûd ve udûlle ba‘de’l-isbât ve’l-halef terekesinden hükmolundukdan sonra nısf-ı âlât-ı mezkûreyi semen-i misli olan üç bin iki yüz guruşa bana bâ-hüccet-i şer‘iyye bâten bey‘ ve semeni olan meblağ-ı merkūmu alacağım olan meblağ-ı mahkûmun-bih-i merkūm üç bin iki yüz guruşa bi’t-terâzi takâs ve mahsûb olunmuşdu deyü mazmûnu takrîr-i meşrûhuna mutâbık bin iki yüz dokuz senesi Şevvâlinin on sekizinci günü târihiyle muvarraha ve ol târihde Mahmudpaşa mahkemesinde nâibü’ş-şer‘i’ş-şerîf olan mevâlî-i izâmdan Faziletlü Hafidzâde Mehmed Emin Efendi’nin imzâ ve hatmini hâviye ibrâz eylediği bir kıt‘a hüccet-i şer‘iyyenin mazmûnunu bizler bi’l-asâle ve bi’l-vekâle ikrâr ve tasdîk etmemizle ol vechile da‘vâ-yı mezkûreden meşrû‘a olmayıp zimmî-i mersûma bî-vech mu‘ârazadan men‘ olunmuşduk lâkin mersûm Kostandi zimmî malından teberru‘an yüz elli guruş bize def‘ ve teslîm biz dahi yedinden bi’l-asâle ve bi’l-vekâle ahz u kabz ve benimle [79a] müvekkilelerimiz mersûmetân beynimizde iktisâm edip bi’l-cümle husûs-ı mezkûra ve mebî‘-i mezkûrun tağrîr ve gabnine vesâir cemî‘-i hukūk-ı şer‘iyyeye müte‘allika mutlakan âmme-i de‘âvî ve kâffe-i mütâlebâtdan mersûm Kostandi zimmînin zimmetini kabûlünü hâvi ibrâ-i âmm-ı sahîh-i şer‘î ile her birimiz bi’l-asâle ve bi’l-vekâle ibrâ ve iskāt eyledik deyü ikrâr ve tasdîkleri İstanbul mahkemesinde tescîl ve huzûr-ı âlîlerine i‘lâm olundu. Fî-23 Ş sene [1]217