İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 459 Hüküm no: 536 Orijinal metin no: [79a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Hacı Hüseyin’den vârislerine intikal eden nısf hisse çörekçi dükkânı gediğinin diğer yarısının Seyyid Mehmed Usta b. Halil’e ait olduğu Çörekçi gediği muhâyâsı Ma‘rûz İstanbul’da Hocapaşa’da çörekçi iken bundan akdem fevt olan el-Hâc Hüseyin’in verâseti zevcesi Hatice bt. Abdullah nâm hatun ile sulbiye-i kebîre kızı Emine Hatun’a ve li-ebeveyn kız karındaşı olup vilâyet-i Anadoluda sâkine Döndü nâm hatuna inhisârı tahakkukundan sonra zevce-i mezbûre Hatice Hatun’un vekîl-i müsecceli ve gāibe-i mezbûrenin hissesini zabt ve hıfz ve idâreye vasî ve kayyım ta‘yîn olunan el-Hâc Hâfız Mehmed b. Ahmed ile zâtı mu‘arrefe mezbûre Emine Hatun meclis-i şer‘-i münîrde çörekçi esnâfından es-Seyyid Mehmed Usta b. Halil muvâcehesinde mârru’z--zikr Hocapaşa’da tulumba dibinde kâin bir bâb çörekçi fırını derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmenin nısf-ı şâyi‘i mezbûr es-Seyyid Mehmed Usta’nın ve nısf-ı şâyi‘-i âharı mûrisimiz babam müteveffâ-i mezbûrun ile’l-vefât yedinde mülkü ve ba‘de vefâtihi sekiz sehm i‘tibârıyla bir sehmi zevcesi üvey vâlidem müvekkile-i mezbûre Hatice Hatun’a ve dört sehmi bana ve bâkī üç sehmi kız karındaşı ammem gāibe-i merkūme Döndü Hatun’a mevrûs ve müntakil olup lâkin fırın-ı mezkûrda mezbûr es-Seyyid Mehmed Usta sâkin ve âlât-ı lâzıme-i merkūmeyi müstakillen isti‘mâl edip ve âlât-ı mezkûre kābil-i kısmet olmamağla ber-vech-i âtî beynimizde muhâyât zabt ve istediğimiz kimesneyi fırın-ı mezkûrda iskâna mümâna‘at etmemek üzere merkūm es-Seyyid Mehmed Usta’ya tenbîh olunmak matlûbumuzdur deyü da‘vâ ol dahi ber-vech-i muharrer ikrâr u i‘tirâf ve ibtidâ beynlerinde ihtilaf etmeleriyle tatyîb-i kulûb-ı tarefeyn için beynlerinde kur‘a olundukda fırın-ı mezkûrda evvel oturmak mezbûr es-Seyyid Mehmed Usta ismine zuhûr etmekle işbu târih-i i‘lâm senesi şehr-i Ramazani’l-mübâreki gurresinden bir sene-i kâmile merkūm Mehmed Usta sâkin olup senesi tamamında çıkıp verese-i mezbûre diledikleri ustayı iskân etmek üzere tarefeyn terâzi ve ittifâk edip ve bu vechile kat‘-ı münâza‘a eyledikleri İstanbul Mahkemesi’nden huzûr-ı âlîlerine i‘lâm olundu. Fî-gurre-i min-Ramazan sene [1]217