İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 461 Hüküm no: 538 Orijinal metin no: [79b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Âkile bt. Mehmed’in, boyacı esnafından Mehmed Usta b. Hasan aleyhine açtığı boyacı gediği davasında iddiasını ispat edemediğinden muarazadan men edildiği Boyacı gediği da‘vâsı mu‘ârazadan men‘ Ma‘rûz Mübârek rikāb-ı kamer-tâb-ı hüsrevânîye takdîm-i arzuhâl eden mu‘arrefetü’z-zât Âkile bt. Mehmed nâm Hatun meclis-i şer‘-i hatîrde zikri âtî boyahâne tâ‘bir olunur âlât-ı lâzımenin altı sehm i‘tibâriyle bir sehmine vaz‘-ı yedi mütehakkık olan bogasî ve astar boyacı esnâfından Mehmed Usta b. Hasan mahzarında İstanbul’da Fazlıpaşa Sarayı’nda kâin bogasî ve astar boyahânelerinde sağ tarafda üçüncü karhânede babam Sarı Mehmed Usta b. Abdullah nâm kimesne boyacı ustalarından olup derûnunda mevcûde beyne’l-hıref gedik tâ‘bir olunur âlât-ı lâzıme-i ma‘lûmenin altı sehm i‘tibâriyle bir sehmine mâlik iken bin yüz doksan altı târihinde Rumeli’nde Kırkkilise’de fevt oldukda verâseti zevcesi vâlidem Hafîze bt. el-Hâc Mustafa nâm Hatun ile sulbî oğlu li-ebin karındaşıma ve bana münhasıra olup vâlidem mezbûre Hafîze dahi fevt ve verâseti kezâlik bana münhasıra olmağla tashîh-i meselesi bi-hükmi’l-münâsahati ve’l-ihtisâr on iki sehm i‘tibâriyle yedi sehmi oğlu mezbûra ve beş sehmi bana isâbet edip ol vechile âlât-ı lâzıme-i mezkûreden bir sehm hisse-i merkūmeyi ber-mûceb-i tashîh merkūm on iki sehm i‘tibâriyle beş sehm-i şâyi‘i bana isâbet ve intikāl etmişken merkūm Mehmed Usta fuzûlî zabt etmekle hisse-i irsiyye-i şâyi‘a-i mezkûremden keff-i yedine tenbîh olunmak murâdımdır deyü da‘vâ ettikde mezbûr Mehmed Usta cevâbında âlât-ı lâzıme-i mezkûrenin ber-vech-i muharrer altı sehm i‘tibâriyle bir sehmi müdde‘iye-i mezbûrenin babası müteveffâ-i merkūm Sarı Mehmed Usta’nın hayatında yedinde mülkü olup perâkende düyûn-ı kesîreye ibtilâsı sebebiyle bin yüz doksan iki senesinde Rumeli cânibinde Kıkrkilise’ye âzim ve râhî olduğu esnâda esnâf-ı merkūme kethüdâsı olan Hasan Ağa b. Ahmed nâm kimesneden düyûnunu îfâ için iki yüz guruş iktirâz ve kabz edip gedik tâ‘bir olunan âlât-ı lâzıme-i mezkûreden mâlik olduğu bir sehm hisse-i merkūmesini semen-i misliyle âhara bey‘e ve semenini kabz ve deyni olan meblağ-ı merkūma takās ile istîfâya merkūm Hasan Ağa’yı tarafından vekîl etmekle ol dahi ba‘de kabûli’l-vekâle âlât-ı mezkûreden bir sehm hisse-i merkūmeyi târih-i mezbûreden semen-i misli olup bi’l-vekâle makbûzu olan iki yüz guruşa müşterikleri Molla İsmail ve Molla Mehmed ve İbrahim Usta ve Hacıoğlu Molla Mehmed ve Uzun Hasan nâm beş nefer ustalara ale’l-iştirâki’s-seviyy bi’l-vekâle bey‘ ve temlîk ve teslîm etmekle onlar dahi ber-vech-i muharrer iştirâken iştirâ ve temellük ve tesellüm ve kabûl eylediklerinden sonra bir sehm hisse-i mezkûreyi kezâlik iki yüz guruş semen-i makbûza bana bey‘ ve temlîk ve teslîm etmeleriyle ben dahi iştirâ ve temellük ve tesellüm ve kabûl etmemle ol vechile mülk-i müşterâm olmak üzere bi-hakkın vaz‘-ı yed ederim deyü eylediği def‘ini müdde‘iye-i mezbûre Akile Hatun şehâdetlerinde tasdîk ve adâletlerinde tahkīk eylediği hâlâ esnâf-ı merkūme kethüdâsı Mehmed Ağa b. Mehmed ve el-Hâc Ali b. İbrahim ve Câbi Mehmed b. Ahmed ve Kocabaş İbrahim Beşe b. Hüseyin nâm kimesneler şehâdetleriyle bi’l-muvâcehe vech-i vecih-i şer‘î üzere isbât etmeğin mûcebince müdde‘iye-i merkūme Âkıle Hatun da‘vâ-yı mezkûresiyle merkūm Mehmed Usta’ya bî-vech-i şer‘î mu‘ârazadan men‘ olunduğu tescîl İstanbul Mahkemesi’nden huzûr-ı âlîlerine i‘lâm olundu. Fî-gurre-i Ramazan sene [1]217