İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 462 Hüküm no: 539 Orijinal metin no: [79b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Talita Nasrâniye ile babası Arotin v. Haçador’un birbirlerinin zimmetlerini ibrâ ettikleri Kuyumcu gediği reddi ve ibrâ Ma‘rûz İstanbul’da Balatkapısı dâhilinde Çınarlıçeşme kurbünde Lonca nâm mahalde mütemekkine ve şahsı Eskici Arotin v. Semaven ve Karabet v. Kirkor zimmîler ta‘rîfleriyle mu‘arrefe olan Talita Nasrâniye meclis-i şer‘-i hatîrde babası kuyumcu esnâfından Yüzükçü Arotin v. Haçador zimmî muvâcehesinde babam mesfûr Arotin yedinde mülkü olan İstanbul’da bezzâzistân-ı atîk kurbünde Acıçeşme civârında birbirine muttasıl iki bâb kuyumcu dükkânları derûnlarında mevcûde beyne’l-hıref gedik tâ‘bir olunur âlât-ı lâzımelerini ölünceye değin görüp gözetmek şartıyla bana bey‘ ve temlîk ve kethüdâ defterinde dahi benim ismime kayd ettirmişdi lâkin şart-ı mezkûr ile olan bey‘in fesâdına binâen zikr olunan gedikleri babam mesfûr benden istirdâd etmekle ben dahi sâlifü’l-beyân iki kıt‘a gedikleri babam mersûme red ve teslîm edip zikr olunan gediklere ve bundan akdem hâlik olan anam Biricik bt. Nikagos Nasrâniyenin terekesinden hisse-i irsiyye mütâlebesine ve târih-i i‘lâma gelince beynimizde cereyân eden sâir cemî‘-i hukūk-ı ma‘lûme ve mechûleye müte‘allika mutlakan âmme-i de‘âvî ve mütâlebât ve kâffe-i eymân ve muhâsamâtdan ben babam mesfûr zimmetini ol dahi kezâlik benim zimmetimi her birimiz şürût-ı müfside ve uhûd-ı mübtileden âri ve cebr ve kerhden hâli ibrâ-i âmm-ı sahîh-i şer‘î ile ibrâ ve iskāt ve her birimiz âharın ibrâsını kabûl edip külliyen kat‘-ı münâza‘a eyledik deyü ikrâr ve tasdîkleri İstanbul mahkemesinde tescîl ve mübâşirler es-Seyyid İsmail Çavuş kulları iltimâsıyla huzûr-ı âlilerine i‘lâm olundu. Fî-29 Ş sene [1]217