İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 463 Hüküm no: 540 Orijinal metin no: [79b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Ağa b. Abdülhamid’in vârislerinin, Fâtıma bt. Mustafa ile İsmail Ağa’dan intikal eden menzil davasında anlaştıkları Maraz-ı mevtinden menzil reddi Ma‘rûz Ser-mehterân-ı hayme-i hâssa müteveffâ Veznedar İsmail Ağa b. Abdülhamid nâm kimesnenin sulbî evlâdı sâhibey-i arzuhâl zâtları mu‘arrefe Fâtıma ile sagīr Abdülhamid’in vâlidesi ve min-kıbeli’ş-şer‘ mansûbe vasîsi Mahbûbe bt. Abdullah nâm Hatunlar nezâret-i Hazret-i Sadr-ı a‘zamîde âsûde evkāf müfettişi müderrisîn-i kirâmdan Faziletlü Mehmed Sueda Efendi ma‘iyetiyle Çarşamba günü arz odasında huzûr-ı âsafânelerinde ba‘dehû du‘ahânemizde akd olunan meclis-i şer‘-i hatîrde müteveffâ-i merkūmun zevcesi derûn-ı [80a] arzuhâlde mezkûratü’l-ism mu‘arrefetü’z-zât diğer Fâtıma bt. Mustafa nâm hatun muvâcehesinde nezâret-i hazret-i müşârun-ileyhde âsûde evkāfdan Medîne-i Eyüb’de merhûm Zal Mahmud Paşa Vakfı mütevellîsi mesâhib-i hazret-i şehriyârî es-Seyyid Abdullah Ağa tarafından vekîl-i mürseli câbi-i vakıf Sofalı Mustafa b. Ali hâzır olduğu hâlde vakf-ı mezbûr mülhakātından merhûm Sarı Kethüdâ Mustafa Paşa vakfı musakkafâtından İstanbul’da Sultan Ahmed Hân câmi‘-i şerîfi kurbünde Güngörmez Mahallesi’nde vâki‘ şehriye otuz akçe îcâre-i müecceleli ma‘lûmü’l-hudûd bir bâb vakıf menzil dört sehm i‘tibâriyle bir sehmi mezbûre Fâtıma’nın ve üç sehmi babası müteveffâ-i merkūm İsmail Ağa’nın bi’l-îcâreteyn taht-ı tasarruflarında iken mütevefâ-yı merkūm hayatında mutasarrıf olduğu üç sehm hissesinin iki sehmini fevtinden iki gün mukaddem Hasan’a ve sâhib-i firâş olduğu hâlde zevcesi üvey vâlidemiz merkūme diğer Fâtıma Hatun’a ferağ ve kasr-ı yed edip lâkin ferağ-ı mezkûr maraz-ı mevtinde olup şer‘an sahîh olmamağla nısf-ı menzil-i mezkûrdan bâ-re’y-i mütevellî keff-i yed-birle babamız müteveffâ-i merkūmun intikālından benimle karındaşım sagīr-i mezbûr için tasarrufumuza bî-vech mümâna‘at etmemek üzere merkūme diğer Fâtıma Hatun’a tenbîh olunmak bi’l-asâle ve bi’l-vesâye matlûbumuzdur deyü mütevellî vekîli hâzır-ı merkūmun tasdîkleriyle da‘vâ eylediğimizde ol dahi cevâbında babanız zevcim müteveffâ-i merkūm İsmail Ağa hayatında iki sene mukaddem malımdan ceste ceste cem‘an dört bin iki yüz elli guruş iktirâz ve kabz edip edâ-yı deyn müyesser olmadığına binâen meblağ-ı merkūm mukābelesinde nısf-ı menzil-i merkūmu hâl-i hayât ve kemâl-i akl ve sıhhatinde bâ-re’y-i mütevellî ferağ-ı kat‘î ile bana fâriğ olmuşdur deyip ve şer‘an sıhhat-i beyyinesi evlâ olmağla merkūme diğer Fâtıma Hatun eylediği def‘-i mezkûrunu isbât esnâsında beynimize muslihûn tavassut edip mezbûre diğer Fâtıma Hatun nısf-ı menzil-i mezkûru bi’t-tav‘ ve’r-rızâ yedimizden kabz ve istihlâk eylediği iki bin iki yüz elli guruş bedel-i makbûz mukābelesinde benimle karındaşım sagīr-i merkūm için ale’l-iştirâki’s-seviyy bâ-re’y-i mütevellî ferağ-ı kat‘î-i mu‘teber ile ferağ ve kasr-ı yed etmekle biz dahi bi’l-asâle ve bi’l-vesâye tefevvüz ve kabûl edip bedel-i müstehlek-i merkūmun adem-i istîfâsına ve bi’l-cümle husûs-ı mezkûra müte‘allika âmme-i de‘âvîden ben bi’l-asâle üvey vâlidem merkūme diğer Fâtıma Hatun’un zimmetini kabûlü hâvi ibrâ ve iskāt edip ve vasiyy-i mezbûra dahi husûs-ı mezkûra müte‘allika vesâyeten kat‘an da‘vâ ve nizâ‘ım kalmamışdır deyü mukırretân-ı mezbûretân Fâtıma ve Mahbûbe Hatunların bi’l-cümle takrîr-i meşrûhlarını merkūm diğer Fâtıma Hatun tasdîk ve mütevellî vekîli hâzır-ı merkūm dahi menzil-i merkūmu mezbûre Fâtıma ile sagīr-i mezbûrun vech-i meşrûh üzere tasarrufları için mütevellî-i mezbûr tarafından vekâleten izin verip külliyen kat‘-ı münâza‘a eyledikleri İstanbul Mahkemesi’nden huzûr-ı âlîlerine i‘lâm olundu. Fî-13 Ramazan sene [1]217