İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 464 Hüküm no: 541 Orijinal metin no: [80a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çerkez asıllı Ahmed b. Abdullah’ın hürriyetini ispat ettiği Beyaz gulâm hürriyetini isbât Ma‘rûz Rıkka inkıyâd-ı sâbıkını mu‘terif olmağla ber-vech-i âtî da‘vâya kıbel-i şer‘den me’zûn tahmînen on dört yaşında açık kaşlı elâ gözlü Çerkesiyyü’l-asl Müslimetü’l-mille sâhib-i arzuhâl Ahmed b. Abdullah nâm âkil ve mümeyyiz Çarşamba günü arz odasında huzûr-ı âsafânelerinde ma‘kūd meclis-i şer‘-i hatîrde çadırcı esnâfından olup bundan akdem fevt olan es-Seyyid el-Hâc Mehmed b. Ali nâm kimesnenin zevce-i menkûha-i metrûkesi olup mevsûf-ı merkūma vâzı‘atü’l-yed olan mu‘arrefetü’z-zât Ümmüseleme bt. Mustafa nâm Hatun mahzarında zevcân-ı mezbûrânın sulbiye-i kebîre kızı zâtı mu‘arrefe Fâtıma Hatun hâzıra olduğu hâlde ben müteveffâ-i mezbûrun yedinde abd-i memlûkü olduğum hâlde vefâtından dört sene mukaddem bin iki yüz on bir senesi Muharreminin on beşinci günü mezbûr es-Seyyid el-Hâc Mehmed hayâtında İstanbul’da Nuruosmaniye kurbünde çadırcılar sûkunda kendi dükkânında çadırcı ustaları hâzır oldukları hâlde vâlidem işbu hâzire-i bi’l-meclis hayatı ile beni tedbîr-i sahîh-i mutlak ile tedebbür edip işhâd ettikden sonra dört sene mürûrunda fevt olup sülüs malı dahi kıymetlerimize müsâ‘id olmağla ben ve gerek vâlidem hâzıra-i merkūmeden her birimiz müteveffâ-i mezbûrun sülüs malından âzâd ve hür olup vâlidem merkūme nefsini âhara tezvîc edip ben dahi mevlam müteveffâ-i merkūmun zevcesi mezbûre Ümmüseleme Hatun’un talebiyle yanında ve hizmetinde kalmışken mezbûre Ümmüseleme Hatun bu esnâda bi-gayr-ı hakkın beni istirkāk irâdesiyle bey‘e âzime olmağla sebilim tahliyye olunması matlûbumdur deyü kızı mezbûre Fâtıma Hatun’un tasdîkiyle da‘vâ ettikde mezbûre Ümmüseleme Hatun cevâbında mevsûf-ı merkūm Ahmed zevcim müteveffâ-i mezbûr es-Seyyid el-Hâc Mehmed’in hayatında yedinde abd-i memlûkü olduğu hâlde târih-i mezkûrda Medîne-i Üsküdar’da İhsaniye’de kendi menzilimde mezbûr Ahmed’i bana hibe ve teslîm etmekle ol vechile mülk-i mevhûbum olmak üzere bi-hakkın zabt ve istirkāk ederim deyip ve tarefeynin takrîr-i meşrûhları üzere sûret-i mezkûrede târihler müteceddid olup şer‘an mevsûf müdde‘î-i merkūm Ahmed’in beyyinesi evlâ olmağla merkūm Ahmed ber-vech-i muharrer müdde‘âsını lede’t-tezkiye adl ve makbûlü’ş-şehâde idükleri ihbâr olunan çadırcı esnâfından es-Seyyid Abdülhalim Çelebi b. es-Seyyid el-Hâc İbrahim ve Molla İsmail b. Mehmed nâm kimesneler şehâdetleriyle bi’l-muvâcehe vech-i vecih-i şer‘î üzere isbât etmeğin mûcebince mevsûf-ı merkūm Ahmed’in hürriyetine şer‘an hükmolunup sebili tahliyye olunmak iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî-19 şehr-i Ramazan sene [1]217