İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 465 Hüküm no: 542 Orijinal metin no: [80b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Ali b. Hasan’ın, Abdullah b. Ahmed’den satın aldığı cariyenin illetli olması sebebiyle iade edildiği Zenciye câriye reddi Ma‘rûz Sâhib-i arzuhâl Tütüncü el-Hâc Ali b. el-Hâc Hasan meclis-i şer‘-i münîrde Attâr el-Hâc Abdullah b. el-Hâc Ahmed tarafından husûs-ı âtîde vekîl olduğu udûlden Cündî Mehmed b. Osman ve Mehmed Emin Ağa b. el-Hâc İbrahim şehâdetleriyle sâbit ve sübût-ı vekâletine hükm-i şer‘î lâhık olan es-Seyyid Ali Efendi b. Osman mahzarında târih-i i‘lâmdan yirmi iki gün mukaddem cemî‘-i uyûbdan sâlime olmak üzere altı yüz yirmi beş guruş semen-i medfû‘ ve makbûza müvekkil-i mezbûr el-Hâc Abdullah’dan iştirâ ve kabz eylediğim işbu hâzıra bi’l-meclis uzun boylu açık kaşlı Maverde bir re’s zenciye câriyenin iki gözlerinde tavukkarası tâ‘bir olunur buhar illeti ile mu‘ayyibe ve ayb-ı mezkûr şirâ târihinden kadîm ve inde’t-tüccâr noksan semen icâb eder uyûbdan olmağla redd-i mebî‘ ve istirdâd-ı semen murâdımdır deyü da‘vâ ettikde evvelâ teveccüh-i husûmet için bu makūle uyûbu teşhîse me’mur li-ecli’l-irâe hâlâ ser-etibbâ-i hâssa Sa‘âdetlü Semâhatlü Fazîletlü Efendi hazretleri re’y ve ma‘rifetleriyle hâssa Kehhâlbaşısı el-Hâc Mustafa Efendi vesâir kehhâlân ba‘de’n-nazar câriye-i mevsûfe-i merkūme illet-i mezkûre ile mu‘ayyibe olduğunu bi’l-ittifâk ba‘de’l-ihbâr vekîl-i mezbûr es-Seyyid Ali Efendi istintak olundukda müvekkilim mezbûr el-Hâc Abdullah zikr olunan câriyeyi ber-vech-i meşrûh cemî‘-i uyûbdan sâlime olmak üzere ol mikdâr guruş semen-i makbûza müdde‘î-i mezbûr el-Hâc Ali’ye bey‘ini bi’l-vekâle kat‘iyyen ve i‘tirâf edip lâkin ayb-ı mezkûrun kademini inkâr etmekle müdde‘î-i merkūm el-Hâc Ali câriye-i merkūmenin iki seneden beri illet-i mezkûreye mübtelât olup reddini îcâb eder ayb-ı mezkûrun kadîm olduğunu udûlden Kehhâlbaşızâde Hâfız Ahmed Efendi b. el-Hâc Mustafa ve kehhâl-i sâni es-Seyyid el-Hâc Abdülkādir Efendi b. el-Hâc Ali şehâdetleriyle vekîl-i mezbûr muvâcehesinde vech-i vecih-i şer‘î üzere ba‘de’l-isbât ve’l-halef mûcebince câriye-i merkūmeyi geri ahz-birle müvekkil-i mezbûrun makbûzu olan semen-i merkūm altı yüz yirmi beş guruşu müdde‘î-i mezbûr el-Hâc Ali’ye red ve teslîme müvekkil-i mezbûr el-Hâc Abdullah’a izâfetle vekîl-i mezbûra tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî-25 min-Ramazan sene [1]217